Përurohet monumenti i të Lumes Nënë Terezës në hyrje të aeroportit ndërkombëtar Rinas
të Tiranës
(13.9.2007 RV)Në kuadër të aktiviteteve në përkujtim të 10 vjetorit të vdekjes
së Nënë Terezës, Presidenti i Republikës së Shqipërisë, zoti Bamir Topi, Kryetarja
e Kuvendit zonja Jozefina Topalli, Kryeministri Sali Berisha dhe personalitetet më
të larta të shtetit, si dhe Kryetari i Konferencës Ipeshkvnore Katolike të Shqipërisë
imzot Rrok Mirdita morën pjesë sot paradite në ceremoninë e vendosjes së monumentit
të Lumes Nënë Terezës, në hyrje të aeroportit ndërkombëtar Nënë Tereza, në Rinas.
Në këtë ceremoni ishin të pranishëm edhe Ministri i Kulturës, Rinisë dhe
Sporteve Ylli Pango, përfaqësues të komuniteteve fetare në vend, personalitete të
kulturës dhe artit etj. Kryeministri Berisha dhe Kryetarja e Kuvendit Topalli zbuluan
monumentin e Nënë Terezës, vepër e skulptorit Luan Mulliqi. Kryeministri, duke
vlerësuar veprën e humanistes shqiptare si frymëzuese, u shpreh: Fjalët e kanë të
vështirë të paraqesin veprën e saj, monumentet, cilado qofshin, të vështirë të simbolizojnë
monumentin e madh të humanizmit që ajo ndërtoi me përkushtimin e jashtëzakonshëm,
dashurinë dhe forcën e besimit tek Zoti dhe Krishti, me forcën e dashurisë njerëzore.
Në këtë vepër, Luan Mulliqi, një nga skulptorët më të shquar shqiptarë, ia kadal
të paraqesë tiparet më të holla dhe të mëdha shpirtërore të Nënë Terezës. Është një
monument pa piedestal, si një bimë nga toka që ecën drejt qiellit. I ka dhënë tiparet
e një gruaje të përvuajtur, por thellësisht të vendosur në misionin e saj të madh.
Ky është një nderim që ne i bëjmë asaj që nderoi më shumë se kushdo tjetër, njeriun.
Nënë Tereza nderoi më shumë se kushdo tjetër në shekullin e saj njeriun, moralin
e tij.” Monumenti i Nënë Terezës është derdhur në bronz dhe ka lartësi 6 metra.