(06.09.2007 RV)Një reflektim biblik i kardinalit kryeipeshkëv të Milanos, imzot
Dionixhi Tetamanci hapi sot ditën e dytë të punimeve të Asamblesë III Ekumenike evropiane
në Sibiu të Rumanisë. Sot, rreth 2000 pjesëmarrësit folën mbi nevojën që të krishterët
në Evropë të japin një dëshmi të vërtetë feje, duke kapërcyer një vizion thjesht kulturor
të krishterimit. Kjo do t’u lejonte atyre të paraqiteshin para politikanëve si bashkëbisedues
të vlefshëm. Në forumet e pasdites ndërmjet katolikëve, protestantëve dhe ortodoksëve
u diskutuan tema të rëndësishme si procesi i bashkimit të Evropës, dialogu ndërfetar
dhe emigracioni, në një kontinent gjithnjë e më tepër multikulturor e multietnik. Evropa
ka besim në kontributin e kishave dhe të bashkësive fetare e konfirmimi erdhi nga
prania e presidentit të Komisionit Evropian, Hosè Manuel Barroso, në kryeqytetin e
Transilvanisë. Në fjalën drejtuar asamblesë, Barroso nënvizoi faktin se në Traktatin
evropian të rishikuar, njihet roli i kishave në bashkimin e Evropës. Ai iu referua
qartë rolit të Papës Gjon Pali II për bashkimin e lindjes me perëndimin. “Vetëm duke
u bazuar mbi vlera të caktuara – tha Barroso – Bashkimi Evropian mund të jetë më shumë
se një treg apo një shoqëri interesash”