Më 23 korrik Kisha kremton Shën Brigjiden e Suedisë, bashkëpajtore e Evropës.
(23.07.2007 RV)Sot Kisha katolike përkujtoi
Shën Brigjidën, Pajtore e Evropës. Lindi në Finstad të Suedisë në qershor të vitit
1302 në një familje fisnike, thellësisht të krishterë. I jati, Birgen Person, gjykatës
dhe governator i zonës Upplan, njihet si autor i legjislacionit të parë të krishterë
në mbretërinë e Suedisë. Brigjida, e martuar në moshë të re, qe bashkëshorte e nënë
shembullore e tetë fëmijëve. Pas vdekjes së bashkëshortit, u dha pas jetës asketike.
Më 1350 shtegtoi drejt Romës me rastin e jubileut e nuk u kthye më në atdhe. Themeloi
urdhërin rregulltar të të Shëlbuemit, që njihet edhe me emrin i Brigjidineve. Vdiq
në Romë më 1373. Papa Gjon Pali II e quajti Shën Brigjidën “specialiste e shpirtit"
dhe i ftoi simotrat e saj të jenë kudo ndërtuese të palodhura të ekumenizmit të madh
të shenjtërisë. E Benedikti XVI, duke folur një vit më parë për Shën Brigjidën,
Pajtore e Evropës, në ditën e festës së saj, theksoi “Erdhi nga Suedia në Romë e,
prej këndej, shtegtoi në Tokën Shenjte; na fton kështu ta ndihmojmë njerëzimin të
gjejë paqën e vërtetë pikërisht në Tokën Shenjte”. Kujtojmë se Urdhëri i Brigjidineve,
veprimtaria ekumenike e të cilit vlerësohet shumë në viset veriore të Evropës, ku
ka pak katolikë e ku prandaj dialogu është më i rëndësishëm se gjetiu, sot numron
600 rregulltare dhe 45 bashkësi të përhapura në mbarë botën. Abadesha e përgjithshme
e Urdhërit prej shumë vjetësh, është Nënë Tekla Familieti. Në mikrofonin e
Radios sonë, flet kështu për Shenjten themeluese të Kongregatës që drejton: Përgjigje:
- “Amor Meuus Crocifixus est” – “Dashuria ime është i Kryqëzuari” – ishte motua
e saj. Karizma e saj ishte lavdërimi i përhershëm i Hyjit, dhurimi i jetës për shpërblim
të mëkateve dhe bashkimi i Kishës. I mëson gratë e kohëve tona ta çojnë dashurinë
e Krishtit në të gjitha fushat e shoqërisë.