(23.07.2007 RV)Këshilli i Ministrave të jashtëm të Bashkimit Evropian rinovoi
sot mbështetjen e tij të plotë për “perspektivat evropiane të Shqipërisë”, për të
cilat natyrisht akoma duhen plotësuar të gjitha kushtet e kriteret. Kështu shkruhet
në një dokument të publikuar në Bruksel, ku nënvizohet se 27 vendet evropiane “inkurajojnë
të gjitha forcat politike shqiptare të punojnë sëbashku për të bërë hapa përpara në
reformat e domodoshme”. Këshilli thekson se është e rëndësishme që Shqipëria të vazhdojë
të luajë një rol konstruktiv në rajon. Deklarata e Brukselit vjen menjëherë pas
zgjedhjes së presidentit të Republikës së Shqipërisë, Bamir Topi. Konsensus të gjerë
ka fituar emri i tij, për shkak të integritetit të Bamir Topit si person, por debate
të ashpra ka pasur për mënyrën e zgjedhjes, me anë të votave të gjashtë socialistëve,
të përjashtuar tashmë nga partia e tyre.