(22.07.2007 RV)Sot, e diela XVI
e kohës së zakonshme gjatë vitit kishtar, Kisha katolike kremtoi edhe Shën Marinë
Madalenë, nxënëse e Zotit. “Jezusi u kujton gjithë të krishterëve se duhet t’i
shërbejnë mbarë tokës, duke u bërë për të kripë e dritë”. Është reflektimi që buron
nga liturgjia e festës së Shën Brigjidës, rregulltare, Pajtore e Evropës, që do
të kremtohet nesër, e hënë. Të martën Kisha do të përkujtojë Shenjtin
Sharbel Makluf, meshtar e Shën Kristinën, virgjër e martire. Me jetën e tyre na nxisin
të meditojmë se detyra kryesore e njeriut është të bëjë vullnetin e Zotit. Detyrat
e kërkesat e tjera të panumërta të jetës njerëzore, që nga ato të familjes, tek detyrat
e punës, janë të gjitha të dorës së dytë e të gjitha të varura pikërisht nga vullneti
i Zotit. Në përkujtimin e Shën Jakut të madh, apostull e të Shën Kristoforit,
martir që do të kremtohen të mërkurën, liturgjia na kujton se kush mbjell
me vaj, do të korrë me gëzim! E kjo do të thotë se ecja në gjurmët e Jezusit nuk të
çon tek ngjitja e shkallëve të karrierës. Të ndjekësh Krishtin do të thotë të pish
me fund kelkun e mundimeve të Tij. Shën Jaku e Shën Ana, prindërit e Virgjërës
Mari, që do të kremtohen të enjten, na kujtojnë se lumnia e vërtetë e nxënësve
të Krishtit është se arritën të shohin me sytë e tyre e të dëgjojnë me veshët e tyre
atë që profetët e të drejtët e dëshiruan me gjithë zemër, por s’e panë, as s’ e dëgjuan.
Të premten e ardhshme Kisha do të kremtojë festën e Shën Pantaleonit,
mjek e martir dhe të Shën Çelestinit papë. Liturgjia e festës na kujton shembëlltyrën
e farëhedhësit. Secili nga ne duhet të marrë pjesë në këtë hedhje, pa menduar për
cilësinë e arës, por për ‘mirësinë’ e farës. Shenjtorët Nazari e Çelsi, martirë
milanezë e shë Vitori, papë , që do të kremtohen të shtunën, me liturgjinë
e festës së tyre na kujtojnë se shembëlltyra e egjrës, mbjellur në të njëjtën arë
me grurin, është simbol i padurimit të atyre që e konsiderojnë veten të mirë e që
kërkojnë të ndërhyjë menjëherë drejtësia e Zotit i cili, ndërkaq, i rregullon kohët
e veta me orën e mëshirës.