Lajme nga bota:krijimi i shtetit palestinez krah atij të Izraelit etj
(20.07.2007 RV)Me impenjimin e bashkësisë ndërkombëtare për krijimin e një
shteti palestinez, që të jetojë krah atij të Izraelit, përfundoi mbrëmë në Lisbonë
takimi i Kuartetit për Lindjen e Mesme. Ndërkaq, sot u liruan 250 të burgosurit palestinezë,
që mbaheshin në Izrael, në mbështetje të presidentit Abu Mazen.
Në Afganistan,
një kamikaze ka hedhur në erë makinën e tij kundër një karvani ushtarak britanik në
provincën e Helmandit. Dy civilë afganë u vranë e 4 ushtarë britanikë u plagosën.
Ndërkaq, talebanët morën përsipër rrëmbimin e 18 të krishterëve evangjelistë koreanojugorë,
të pesë afganëve dhe dy gjermanëve. Për lirimin e këtyre të fundit, është kërkuar
largimi i trupave gjermane nga vendi dhe lirimi i të gjithë talebanëve nga burgu.
Ultimatumi skadon nesër në orën 12.
U arrit dje në Pekin, marrëveshja mbi
objektivat e fazës së dytë të procesit të çarmatimit bërthamor të Koresë së Veriut,
megjithëse nuk janë caktuar afate. 6 shtetet e përfshira në bisedime e vazhduan
takimin maratonë deri në arritjen e marrëveshjes.
Sipas sondazheve, presidentja
e re e Indisë mund të jetë grua. Nuk janë rezultate zyrtare, por duket se 64%
të votave mund ta fitojë guvernatorja e shtetit të Raxhastanit, Pratiba Patil. Do
të ishte presidentja e parë grua e Indisë.