Benedikti XVI u gëzua shumë për lirimin e Atë Bosit, në Lorencago ku pushon e ku sonte
ndoqi koncertin e koreve të malësorëve.
(20.07.2007 RV)Papa dhe bashkëpunëtorët
e tij e pritën me gëzim të madh lajmin e mbrëmshëm për lirimin e Atë Bosit, misionar
italian i rrëmbyer më 10 qershorin e kaluar në Filipine. Tani – deklaroi drejtori
i Sallës vatikanase të Shtypit, atë Federiko Lombardi - urojmë që Atë Bosi ta rifillojë
qetësisht veprimtarinë e tij misionare e të mos përsëriten kurrë më rrëmbimet ose
episode të tjera dhune në zonë. Por të kthehemi në Lorencago të Kadores, prej nga
për ditën e sotme të pushimit të Papës na flet, si zakonisht, i dërguari i gazetës
‘Avvenire’ Salvatore Maca, të cilin e pyetëm posaçërisht për koncertin që u
dha sonte për nder të Benediktit XVI: Përgjigje: - Po, kënduan shtatë kore,
dmth të gjitha koret e Kadores: ishte një shfaqje e veçantë, që u dha për Papën,
absolutisht në mënyrë private. Koncerti u dha në Kështjellën e Mirabelos. Ishin të
pranishëm vetëm koristët dhe grupi që shoqëron Atin e Shenjtë. Pyetje: -
Po afrohet një takim tjetër i rëndësishëm publik i Benediktit XVI: lutja e Engjëllit
të Tënzot e së dielës në Sheshin Kalvi të Lorencagos… Përgjigje: - Është
pak të themi se pritet me padurim; më në fund vendasit do të kenë mundësi ta shohin
Papën në shtëpinë e tyre. Do të jetë, sigurisht, festë e madhe për të gjithë zonën.
Priten 4 mijë vetë: banorë të vendit, veronjës e banorë të fraksioneve fqinje me
Lorencagon.