Rajs: Kosova e pavarur "në një mënyrë apo në tjetrën"
(19.07.2007 RV)U mblodh sot në Lisbonë, Kuarteti për Lindjen e Mesme, në kuadrin
e të cilit u fol edhe për Kosovën. Sot paradite, sekretarja e shtetit amerikan, Kondolica
Rajs pati deklaruar për gazetarët gjatë udhëtimit për në Portugali (presidente e radhës
e Bashkimit Evropian) se Kosova do të jetë e pavarur nga Serbia, në "një mënyrë ose
në tjetrën", pavarësisht nga kundërshtimet e Rusisë në Kombet e Bashkuara. Pasdite,
ministri i jashtëm portugez, Luis Amado u takua me homologun e tij serb, Vuk Jeremiç.
Ky i fundit sqaroi se qëndrimi i Serbisë është diametralisht i kundërt me atë amerikan.
Po sot, arriti edhe konfirmimi më zyrtar deri tani, për pozicionin e Rusisë. Zëdhënësi
i Dumës ruse, Dhomës së ulët të parlamentit, nga Podgorica ku ndodhej për vizitë,
u shpreh qartë se Rusia do të vendosë veton në Këshillin e Sigurimit ndaj çdo rezolute
që nuk është pranuar më parë nga Beogradi.