(18.07.2007 RV)Çështja e Kosovës
në rendin e ditës në Këshillin e Sigurimit të OKB-së. Vendet perëndimore sfidojnë
Rusinë. Mbrëmë vonë u zyrtarizua rezoluta e paraqitur nga SHBA-të, Britania e Madhe
dhe Franca, e cila teknikisht mund të votohet të enjten ose të premten. Gjithsesi,
vëzhguesit po presin reagimin e Rusisë për të vendosur mbi një votim të mundshëm.
Ndërkaq, ekipi i unitetit në Kosovë është mbledhur sërish sot për të përcaktuar
qëndrimin që do të mbahet në takimin me sekretaren amerikane të shtetit, Kondolica
Rajs, parashikuar për të hënën, 23 korrik. Rajs ka folur sot në telefon me ministrin
e jashtëm rus, Sergei Lavrov edhe për rezolutën e Kosovës. Argumentat e tjera të bisedës
kanë qenë tërheqja e Kremlinit nga Traktati mbi armët konvencionale në Evropë, Lindja
e Mesme dhe programi bërthamor iranian. Po sot, Moska, nëpërmjet një funksionari të
lartë të Ministrisë së Mbrojtjes, gjeneralit Buzhinski, propozoi një marrëveshje të
re që të zëvendësojë Traktatin e vjetër mbi armët konvencionale, konsideruar si jo
më i kohës nga qeveria e presidentit Vladimir Putin. Rusia nuk ka pranuar ndërkaq,
propozimin e NATO-s për një Konferencë të jashtëzakonshme mbi problemet e Traktatit.
Kujtojmë se ky traktat u nënshkrua në Paris në vitin 1990 nga vendet e Paktit të Varshavës
dhe NATO-s. Duket se çështja e Kosovës është shtruar për t’u zgjidhur pikërisht
në këtë konjukturë të vështirë marrëdhëniesh ndërmjet Rusisë dhe vendeve perëndimore.
Edhe gazeta e Vatikanit, “Osservatore Romano” i ka kushtuar çështjes mëse një artikull,
kohët e fundit. Të dielën, Pierluigji Natalia shkruante “Kosova: kërkohet akoma një
marrëveshje e vështirë”. Në numrin e sotëm, në një artikull tjetër me titull “Akoma
asnjë marrëveshje mbi çështjen e Kosovës”, nënvizohet: “Sipas disa vëzhguesve, është
e mundur që në ditët e ardhshme, Këshilli i Sigurimit ta votojë gjithsesi dokumentin,
edhe pa konsensus me Rusinë, e cila në këtë rast do të vendoste veton. Natyrisht,
kjo do ta bënte rezolutën të pavlefshme në planin juridik, por mund të ketë pasoja
në atë politik”. Gazeta i referohet kërkesës kosovare që perëndimi të gjejë një rrugë
alternative për zgjidhjen e statusit të Kosovës, pa Këshillin e Sigurimit të OKB-së.