Atë Federiko Lombardi: zhdëmtimi i rëndë, i caktuar nga kryedioqeza e Los Ánxhelos,
shenjë e impenjimit të Kishës kundër pedofilisë.
(17.07.2007 RV)Plagë - e quan Atë
Lombardi pedofilinë në radhët e klerit. Pas deklaratës së djeshme, dhënë mjeteve të
komunikimit shoqëror nga kardinali-kryeipeshkëv i Los Ánxhelos, Roxher Mahoni, edhe
drejtori i Sallës vatikanase të Shtypit, atë Lombardi, flet për dëmshpërblimin e caktuar
nga kryedioqeza e Los Ánxhelos në favor të 508 viktimave të shpërdorimeve seksuale.
Të dëgjojmë fjalët e Atë Lombardit në këtë notë: “Kuptohet vetvetiu se marrëveshja
e arritur nga kryedioqeza për zhdëmtimin e një numri të madh rastesh të shpërdorimeve
seksuale nga ana e priftërinjve, rregulltarëve e laikëve të kryedioqezës, ndodhur
në dhjetvjeçarin e fundit, është lajm që ka tërhequr vëmendjen e shumkujt, si për
numrin e rasteve, ashtu edhe për shifrat e zhdëmtimit. Por, ashtu siç deklaroi
kardinali Mahoni - e siç kanë theksuar shumë herë Gjon Pali II dhe Benedikti XVI –
Kisha mbi të gjitha ndjen keqardhje të thellë për vuajtjet e viktimave dhe të familjeve
të tyre, për plagët e thella që u janë hapur nga sjelljet e rënda e të pafalshme të
disa prej anëtarëve të saj dhe është e vendosur të impenjohet me të gjitha mjetet
për të shmangur rrezikun e përsëritjes së ndyrësive të tilla. Marrëveshja e arritur,
me gjithë flijimet që përmban, është edhe ajo një shenjë e këtij impenjimi, e vendimit
për të mbyllur një faqe të dhimbshme e për të shikuar përpara në veprimtarinë për
parandalimin dhe për krijimin e një mjedisi gjithnjë më të sigurtë për fëmijët e të
rinjtë në të gjitha fushat e veprimtarisë baritore të Kishës. Gjithsesi, duke
pasur parasysh se problemi i shpërdorimeve mbi fëmijët dhe i mbrojtjes së tyre nuk
ka të bëjë aspak vetëm me Kishën, por edhe me institucione të tjera, është e drejtë
që edhe këto të marrin me vendosmëri masat e nevojshme. Kisha, e vetëdijshme për përgjegjësinë
që ka ndaj rinisë, po përpiqet të jetë në radhët e para të luftës kundër pedofilisë
në të cilën, me të drejtë, po impenjohen sektorë gjithnjë më të gjërë të shoqërisë
në vende të ndryshme të botës.