U botua Motu Proprio “Summorum Pontificum’ e Papës mbi përdorimin e Mesharit Romak
të vitit 1962.
(07.07.2007 RV)Sot u shpall Letra Apostolike e Benediktit XVI, Motu Proprio
‘Summorum Pontificum’, mbi përdorimin e liturgjisë romake të parareformës të vitit
1970, që do të hyjë në fuqi më 14 shtator të vitit në vijim, në Festën e Naltimit
të Shëna Kryqit. Lajmin e dha, të premten e kaluar, Salla vatikanase e Shtypit,
që njoftoi edhe se ‘Motu Proprio’ e Papës do të shoqërohej me një letër sqaruese.
Rishikimi i së kaluarës, i përçarjeve që copëzuan Korpin e Krishtit - shkruan Papa
në këtë Letër - më shtyu t’i bëj të gjitha përpjekjet për t’u krijuar mundësitë ta
gjejnë përsëri unitetin, atyre që kanë dëshirë të jenë të bashkuar. Është, pra,
fjala për përdorimin e Meshës në gjuhën latine, të kremtuar sipas ritit tridentin,
vendosur nga Papa Shën Piu V menjëherë pas Koncilit të Trentit (1542-1563), që mbeti
në përdorim – me rishikimet e mëpasme - deri në vitin 1970, vit në të cilin Pali VI,
pas disa vjetësh eksperimentimi, kodifikoi në Mesharin e ri, Meshën (latinisht e në
gjuhët moderne) sipas udhëzimeve të kushtetutës së Koncilit II të Vatikanit, ‘Sacrosanctum
Concilium’.Meshari i fundit romak i azhurnuar i ritit tridetin u publikua me vendim
të Gjonit XXIII në vitin 1962, në të njëjtin vit kur u hapën punimet e Koncilit II
të Vatikanit.