Selia e Shenjtë i kërkon OKB-së siguri për refugjatët që lypin strehim, posaçërisht
në Lindje të Mesme.
(04.07.2007 RV)Imzot Silvano Tomazi
në Komitetin ekzekutiv të UNHCR: të rritet niveli i sigurisë për refugjatët që kërkojnë
strehim, posaçërisht në Lindjen e Mesme. Komisariati i Lartë i OKB-së për Refugjatët
(UNHCR) t’i propozojë Kombeve të Bashkuara një koordinim më të mirë të politikave
që kanë të bëjnë me flukset e emigrantëve, për të kufizuar dramën e mijëra njerëzve
që vdesin në përpjekjen për të gjetur një jetë më të mirë, larg tragjedive të vendeve
të tyre, e posaçërisht me refugjatët e Lindjes së Mesme. Nxitja është e kryeipeshkvit
Silvano Tomazi, vëzhgues i përhershëm i Selisë së Shenjtë pranë OKB-së së Gjenevës,
i cili këto ditë foli gjatë takimit të Komitetit Ekzekutiv të UNHCR-së. Në dramën
botërore të lëvizjes së përditshme të emigrantëve drejt vendeve ku mendohet se mund
të ndërtojnë një jetë më të mirë, të pamundur në vendet e tyre, duhet theksuar një
aspekt i vijueshëm tragjik, që shpesh kalon në plan të dytë: ai i vdekjes së shumë
njerëzve, në përpjekjen për të arritur në cakun e dëshiruar. Çështjet juridike dhe
rregullimi i flukseve të atyre që kërkojnë strehim, vijojnë të dalin në plan të parë,
duke zbehur problemin e mprehtë të njerëzve që nuk arrjnë ta kapërcejnë shkretërirën
ose detin, kapërcim që për ta do të thotë shpëtim. Mbi këtë problem të posaçëm e
mbi rrugëzgjidhet e tij të mundshme nga ana e Komisariatit të Lartë të OKB-së për
Refugjatët u përqëndrua edhe fjalimi i mbajtur nga përfaqësuesi e Selisë së Shenjtë,
Imzot Tomazi i cili, duke shfrytëzuar statistikat e UNHCR-së, nënvizoi se sot në botë
numrohen 32 milionë refugjatë, por fenomeni është në rritje e, prej disa vitesh, shoqërohet
edhe me një fenomen tjetër, me aksidente tronditëse vdekjeprurëse të mijëra njerëzve
të dëshpëruar, që ikin nga tmerret e vendit të tyre, drejt portit të sigurtë. Një
fenomen i tillë – shpjegoi imzot Tomazi - nuk është thjeshtë zonal. E ndeshim në Mesdhe,
për njerëz që provojnë të kalojnë nga Afrika në Evropë; në Atlantik, për ata që kapërcejnë
Afrikën perëndimore drejt ishujve Kanarie. Po ka edhe njerëz që humbasin jetën për
të kaluar nga Evropa në Evropë; nga Afrika lindore në gadishullin arabik; nga ishujt
karaibike në Kontinentin amerikan; nga Meskika, përmes shkretëtirës, drejt SHBA; nga
Azia, në zona të tjera të Azisë. Një turmë e pafundme njerëzish të pafat gjejnë vdekjen,
duke kërkuar jetën!Prandaj përfaqësuesi i Selisë së Shenjtë kërkoi mbrojtje ligjore
për këta njerëz të cilëve, kur nuk vdesin në ikje e sipër, u duhet të luftojnë kundër
llojeve të tjera të vdekjes fizike ose psikologjike. Prandaj – e ky ishte thelbi i
propozimit – Kombet e Bashkuara duhet t’i studiojnë sistematikisht të gjitha mundësitë
për t’u siguruar këtyre njerëzve mbrojtje jo vetëm kur ikin, por sidomos kur nuk ikin,
kur vendosin të qëndrojnë në vend të vet, duke u mbrojtur të drejtat e njeriut, duke
u krijuar vende pune e duke u siguruar një mjedis sa më paqësor.