(27.06.2007 RV)Duhej të votonte për presidentin sot parlamenti shqiptar, madje
ishte raundi i dytë i zgjedhjes, por partitë nuk kanë dalë akoma me një emër, që të
propozohet si kandidat e jo më të jetë edhe konsensual. Pas raundit të pestë të bisedimeve
mes mazhorancës, së kryesuar nga Partia Demokratike dhe opozitës, së kryesuar nga
Partia Socialiste, emri i vetëm në skenën e zgjedhjeve është nënkryetari i Partisë
Demokratike, Bamir Topi, kandidat i mazhorancës. Por opozita ka kërkuar që kjo kandidaturë
të tërhiqet, pa propozuar nga ana tjetër asnjë person të ri. Mandati i presidentit
Alfred Moisiu përfundon më 24 korrik e nëse nuk zgjidhet një president tjetër, Shqipëria
është e detyruar të përballojë zgjedhje të parakohshme. Natyrisht, do të ishte më
mirë që shqiptarët t’u afroheshin kutive të votimit, kur të ketë mbaruar reforma zgjedhore,
pra ndryshimi i ligjit të zgjedhjeve dhe regjistrimi i popullsisë, që do të lejonte
përpilimin e listave të sakta për zgjedhjet. Po ku ta dish se ç’kanë ndër mend politikanët
e Tiranës?