Skefer i kërkon Putin-it të mos vendosë veton për Kosovën
(26.06.2007 RV)Dje është mbledhur kuarteti për Kosovën, por edhe sot akoma
nuk dihet cilat kanë qenë rezultatet përfundimtare të bisedimeve. Ministri i jashtëm
italian, Masimo D’Alema ka pasur takime dypalëshe me sekretaren amerikane të shtetit,
Kondolica Rajs dhe me ministrin e jashtëm francez. Sot, sekretari i përgjithshëm i
NATO-s, Jap de Hop Skefer i ka kërkuar presidentit rus Vladimir Putin të mos përdorë
veton në Këshillin e Sigurimit të OKB-së, kundër rezolutës mbi Kosovën. Skefer është
takuar me Putin në Moskë.
Çështja e Kosovës ka qenë në qendër të debatit
të kryeministrit shqiptar, Sali Berisha me presidentin serb, Boris Tadiç në takimin
e nivelit të lartë të vendeve të nismës së Bashkëpunimit ekonomik të Detit të Zi,
në Stamboll. Berisha u ndal edhe në origjinën e territoreve kosovare, që, theksoi
ai, iu dhanë shteteve fqinje, ngaqë Perandoria osmane humbi luftën. Kjo deklaratë
shkaktoi reagimin e ashpër të Tadiçit, i cili theksoi se Kosova është vendi i origjinës
së serbëve. Pikërisht më 28 qershor bie përvjetori i 618-të i betejës së Kosovës.
Serbët kanë kërkuar ta festojnë këtë ditë me një marrshim nga Mitrovica në Gazimestan,
pranë Prishtinës, por administrata ndërkombëtare u ka mohuar atyre lejen. Autoritetet
kanë deklaruar se komuniteti serb do të lejohet që të festojë në Gazimestan më 28
qershor, por rruga deri në fushën e Kosovës do të bëhet vetëm me autobusë dhe vetura
civile, të shoqëruara gjithmonë nga policia.
“Ratko Mladiç është në Serbi
dhe qeveria e re ka vullnetin politik për të na dorëzuar 4 kriminelët e luftës që
mungojnë”, por “derisa të mos kapen e dorëzohen, Bashkimi Evropian nuk duhet të nënshkruajë
Marrëveshjen e Asociim-Stabilizimit me Serbinë”. Janë fjalët e kryeprokurores së Gjykatës
së Hagës, Karla del Ponte, gjatë një audience në Komisionin e jashtëm të Parlamentit
evropian. Ndërkaq, zv.presidenti i Komisionit Evropian për sigurinë, Franko Fratini
njoftoi po sot se duke filluar nga viti 2008, Brukseli dhe Beogradi do të ulen në
një tryezë bisedimesh për të shikuar mundësinë e heqjes së vizave për serbët që duan
të udhëtojnë në Evropë.