Rusia kundër Toni Blerit si i dërguar për Lindjen e Mesme
(26.06.2007 RV)Përfundoi pa deklarata formale mbledhja e sotme e Kuartetit
për Lindjen e Mesme në Jeruzalem. Para shpërndarjes së një komunikate për shtyp, emisari
evropian, Mark Ote duhet t’i bëjë një raport Brukselit. Gjithsesi, dihet se Kuarteti
ka diskutuar për emërimin e ish-kryeministrit britanik, Toni Bler si të dërguar të
veçantë për Lindjen e Mesme. Vetë Bler i dorëzoi sot detyrën kryeministrit të ri britanik
Gordon Braun dhe u tregua i gatshëm për të marrë në dorë detyrën e re. Por Moska është
kundër e prandaj, Kuarteti duhet të mblidhet sërish në nivel ambasadorësh për të diskutuar
çështjen. Për çudi, qëndrimi i Moskës përputhet me atë të lëvizjes islamike palestineze
Hamas, e cila e konsideron Blerin një aleat të amerikanëve, protagonist të luftës
në Irak.
“Droga kontrollon jetën tënde? Jeta jote. Bashkësia jote. Nuk
ka vend për drogën”: kjo është tema e fushatës kundër drogës me rastin e Ditës botërore
kundër konsumit dhe trafikut të paligjshëm të drogës, që bie sot. Me përhapjen e drogës,
sqaron sekretari i përgjithshëm i OKB-së, Ban Ki Mun, lidhet edhe përhapja e sëmundjeve
si Sida dhe hepatiti, arësye kjo e mjaftueshme për të luftuar fenomenin. Sipas raportit
më të fundit të Kombeve të Bashkuara për drogën dhe krimin, Shqipëria dhe Hollanda
janë prodhuesit më të mëdhenj të kanabisit në Evropë.
Po sot kremtohet
Dita Botërore në mbështetje të viktimave të torturës. Pikërisht më 26 qershor të vitit
1987 u nënshkrua Konventa e OKB-së kundër torturës. Për t’u shënuar fakti se dokumenti
akoma duhet ratifikuar nga shumë shtete, që e kanë firmosur, pavarësisht se sot mbushen
20 vjet që ka hyrë në fuqi.