Opus Dei – Ta kërkosh Zotin në jetën e përditshme.
(26.06.2007 RV)Duke kremtuar festën Shën Hosemaria Eskriva de Balaguer,
meshtar, themelues i Opus Dei, me që Prelatura është pak e njohur në Shqipëri,
po shpjegojmë sot si është organizuar e ç'veprimtari apostolike kryen në gjirin e
Kishës universale. Së pari, si e konceptoi Imzot Escrivà Opus Dei-n në fillimet
e veprimtarisë së Prelaturës? “Prelatura, siç dihet, e nisi veprimtarinë e
vet apostolike më 1928 dhe ideja themelore ishte të mobilizonte e të rizgjonte tek
të gjithë të krishterët thirrjen për shenjtëri, atë që më pas do të ishte ideja e
shpallur nga Koncili II i Vatikanit: ideja e thirrjes universale për shenjtëri. Kjo
është ideja themelore e Shenjtit. Me kalimin e kohës kuptoi se një ide e tillë duhej
veshur edhe me pekt juridik, brënda Kishë”. Me miratim të Papës Gjon Pali II,
Opus Dei bëhet prelaturë. Dëshirojmë t'i sqarojmë dëgjuesit tanë ç'do të thotë Prelaturë? “Po e shpjegojmë thjeshtë, pa hyrë tepër në hollësitë e përcaktuara nga e Drejta
Kanonike: Koncili II i Vatikanit parashikoi, posaçërisht në Dekretin "Presbiterorum
Ordinis", mundësinë për të ndërmarrë nisma të posaçme baritore nga ana e grupeve të
ndryshme shoqërore në një komb ose në mbarë botën, për të themeluar dioqeze të veçanta
ose prelatura personale. Këto lloj prelaturash personale, duhet të ishin në ndihmë
të Kishës universale për realizmin e veprimtarive të posaçme. Pas Koncilit, Papa Pali
VI hartoi Dekrete që e aktualizuan këtë parashikim e kështu, më 1982, u arrit në themelimin
e asaj që deri në atë kohë njihet si prelatura e parë dhe e vetme personale. Është
fjala për një strukturë që bën pjesë në Kishë dhe jep ndihmesën e vet në asistencën
shpirtërore, formimin apostolik dhe mbështetjen për zhvillimin e veprimtarive apostolike
në shërbim të Kishës në mbarë botën, me një thirrje personale. Prandaj njerëzit apo
besimtarët që hyjnë në Opus Dei nuk e bëjnë këtë mbi bazë të një marrëveshjeje asociative,
me një fjalë shqipe, duke jetuar në kuvend, por duke iu pëgjigjur një thirrjeje që
besojmë se është plotësisht e mbinatyrshme”. Po shpjegojmë me dy fjalë edhe
strukturën e Opus Dei-t: “Opus Dei është prelaturë personale që kryesohet
nga një prelat, i cili në rastin tonë ka edhe autoritet ipeshkvnor; ndahet në disa
rrethe, sipas vendeve të ndryshme të botës, ku është e pranishme dhe në çdo vend ka
një zëvendës të prelatit i cili - i ndihmuar nga këshilli - vë në lëvizje dhe organizon
ndihmën shpirtërore për të cilën kanë nevojë besimtarët e prelaturës; pastaj në çdo
qytet ekzistojnë qendra, të cilat kryejnë veprimtari të ndryshme apostolike, që kanë
në bazë kolegjialitetin e jo idetë personale të njërit apo të tjetrit. Ideja tjetër
është ajo e decentralizimit, domethënë e mishërimit të veprës në mendësinë e në mënyrën
e jetesës të çdo Kombi, duke iu përgjigjur kështu kërkesave të ndryshme në vende të
ndryshme". E duke kaluar te organizimi, shpjegojmë se: Është tepër
i thjeshtë. Si vetë Kisha: përbëhet nga njëra anë prej besimtarëve laikë - pjesa më
e madhe kjo, sepse rreth 98% janë besimtarë laikë, të cilët mund të jenë beqarë, të
martuar ose të vejë, njerëz të lidhur ngushtë me Kishën. Një përqindje e vogël janë
meshtarë, që përbëjnë klerin e Prelaturës dhe zhvillojnë veprimtari të dyfishtë: në
shërbim të formimit të posaçëm të anëtarëve të Prelaturës dhe në shërbim të të gjithë
besimtarëve të tjerë, që e kërkojnë këtë asistencë baritore. Veprimtaria e secilit
varet nga rrethanat personale, familjare e profesionale. Ka edhe njerëz që ia kushtojnë
të gjitha energjitë e të gjithë kohën e tyre e që jetojnë në Qëndrat e Veprës për
të drejtuar veprimtaritë formuese. Ata që jetojnë në familje, kryejnë një apostullim
më të rëndësishëm, atë personal, japin dëshminë e krishterë të doktrinës dhe shembullin
e mirë kudo që ndodhen. Por, si duhet vepruar për të hyrë në Opus Dei?
“Secili duhet ta zbulojë këtë thirrje personale, që nuk e merr në mënyrë - si të themi
- mistike, por përmes njohjes, ndihmës, veprimtarive apostolike, leximit dhe thellimit
në shkrimet e shenjtit Hose Maria si dhe përmes lidhjeve të miqësisë personale. Eshtë
diçka që fiton pjekurinë e vet në shpirtin, në ndërgjegjën e secilit. Nuk është thjeshtë
çështje antarësimi, siç mund të bëhet, bie fjala, në një klub ose shoqatë. Themeluesi
u thoshte me shaka, posaçërisht të rinjve, se siguria e thirrjes nuk fitohet sepse
zbret një engjëll, shkul një pendë nga flatrat e veta e me të shkruan aktin, i cili
vërteton se një njeri ka thirrje. Thirrjen mund ta zbulosh vetëm përmes lutjes!”.
Për të përfunduar, po kujtojmë disa shifra: cili është numri i meshtarëve dhe
ai i besimtarëve që bëjnë pjesë në Prelaturë: “Po të flasim në përgjithësi,
duke rrumbullosur shifrat e viteve të fundit, besimtarët e Prelaturës janë 84 mijë,
në të cilët përfshihen edhe 1. 800 meshtarë. Numri i grave është i barabartë me atë
të burrave. Në Evropë jetojnë rreth 49 mijë besimtarë; në Amerikë - 29 mijë; në Afrikë
– 1. 600 besimtarë; në Azi e Oqeani 4. 700. Shumica e besimtarëve janë të martuar,
jetojnë në familje, ndërsa të tjerët i kushtohen veprimtarive të Prelaturës me kushtin
e çelibatit apostolik..