Filloi sot, në Bazilikën Papnore të Shën Palit jashtë mureve të Romës, triditshja
kushtuar Shën Pjetrit e Shën Palit.
(26.06.2007 RV)Të enjten e ardhshme, në Bazilikën Papnore të Shën Palit jashtë
mureve të Romës, Benedikti XVI do të shpallë Vitin Paolin: vit i posaçëm, kushtuar
Apostullit të Popujve me rastin e dymijëvjetorit të lindjes, nësa mendohet të ketë
lindur ndërmjet vitit 6 e 10 pas Krishtit. Në orën 17. 30 Papa do të kryesojë në
bazilikën paoline lutjet e para mbrëmësore pontifikale të solemnitetit të Shën Pjetrit
e Shën Palit, të cilët Kisha i kremton më 29 qershor. Ndërsa sot pasdite, sekretari
i Shtetit të Vatikanit, kardinali Tarçizio Bertone kryesoi, duke nisur nga ora 17.
30, në bazilikën e Shën Palit jashtë mureve, lutjet mbrëmësore dhe Meshën shenjte
të ditës së parë të triditshes Pjetro-Paoline. Nesër, në orën 18.00, në lutjet
mbrëmësore do të marrin pjesë përfaqësues të bashkësive të ndryshme të krishtera,
që do të shpallin së bashku pranë Elterit të Konfesionit, ‘Himnin e dashurisë’, këtë
kryevepër të shpirtit e të letërsisë së krishterë. Në ditën kur kremtohen e Shën Pjetri
e Shën Pali, lutjet mbrëmësore dhe Mesha solemne do të kryesohen nga abati benediktin
Edmund Pauer, në bashkëkremtim me kardinalin Andrea Cordero Lanza di Montexemolo,
kryeprift i bazilikës së Shën Palit jashtë muerve të Romës. Në orën 20.00 do të kremtohet
proçesioni i zinxhirit të Shën Palit.