Në takimin e Benediktit XVI me Tonin Bler u fol për paqen në Lindjen e Mesme, ardhmërinë
e Bashkimit Evropian dhe dialogun ndërfetar.
(23.06.2007 RV)Në një atmosferë shumë të përzemërt, Papa priti sot në audiencë
kryeministrin britanik, Toni Bler, që arriti në Romë pak orë pas largimit nga Brukseli,
ku mori pjesë në takimin e rangut të lartë, në qendër të vëmendjes së opinionit botëror.
“Dëgjova se u krye me sukses” – i tha Papa kryeministrit britanik, pasi shtrënguan
duart. ‘Po’- u përgjigj Bler – por ishte një natë tepër gjatë. Përfundoi sot në mëngjes,
në orën 5. 30’. Këto fjalë u shkëmbyen në Sallën e Fronkës, para se të fillonte bisedimi
privat. Gjatë këtij bisedimi – sipas Komunikatës së Sallës së Shtypit të Vatikanit
– u fol për disa aspekte të kontributit të rëndësishëm që ka dhënë Toni Bler gjatë
dhjetë vjetëve të qeverisjes së tij. Pastaj Papa dhe kryeministri britanik u ndaluan
kryesisht tek situata ndërkombëtare, pa harruar çështjet posaçërisht delikate të konfliktit
në Lindjen e Mesme dhe të ardhmërisë së Bashkimit Evropian, menjëherë pas samitit
të Brukselit. Së fundi, si shkëmbyen opinione mbi disa ligje, miratuar kohët e fundit
nga parlamenti i Mbretërisë së Bashkuar, Papa i bëri Toni Blerit urimet më të mira
në prag të largimit nga detyra e kryeministrit, duke pasur parasysh se Bler ka shprehur
dëshirën të impenjohet në mënyrë të posaçme për paqen në Lindjen e Mesme dhe për
dialogun ndërfetar. Menjëherë pas bisedimit privat, u hapën dyert e Bibliotekës
së Benediktit XVI dhe hyri delegacioni që shoqëronte Blerin: në të bënin pjesë 11
personalitete si dhe bashkëshortja e kryeministrit britanik, Sheri. Bleri i dhuroi
Papës tri fotografi të epokës, të kardinalit të madh Gjon Henri Njuman, anglikan i
kthyer në katolicizëm në shekullin e kaluar. Njëra nga fotot ishte e nënshkruar nga
vetë kardinali Njuman, ndërsa Benedikti XVI u dhuroi të pranishmëve medalje të papnisë
e rruzare. Pasi u përshëndet me Papën, Bler zbriti në katin e dytë të Pallatit Apostolik,
ku u takua me kardinalin Tarçizio Bertone, Sekretar i Shtetit të Shenjtërisë së Tij.