BE-ja Kosovës: të mos merren vendime "të papërgjegjshme"
(21.06.2007 RV)Bashkimi Evropian e paralajmëroi sot Kosovën që të mos bëjë
ndonjë deklaratë “të papërgjegjshme” mbi pavarësinë e vendit, pasi Rusia hodhi poshtë
edhe projektrezolutën e djeshme, që parashikonte shtyrjen e përcaktimit të statusit
për 4 muaj. I dërguari evropian në Kosovë, Stefan Lene, pas takimit me presidentin
Fatmir Sejdiu, sqaroi se një hap i tillë nuk do të ndihmonte në kapërcimin e pengesave,
por do të krijonte shumë të tjera. Natyrisht, problemet i krijohen Brukselit, i cili
ka nevojë për një bazë ligjore ndërkombëtare të fuqishme, siç mund të jetë një rezolutë
e Këshillit të Sigurimit, që të sigurojë unanimitetin për misionin e vet në Kosovë.
Por durimi i shqiptarëve po mbaron. Presidenti Sejdiu tha qartë se “kosovarët
do të dëshironin një rezolutë të OKB-së, por nëse kjo nuk arrihet ka alternativa të
tjera”.