Nga takimi i ROAKO-së, thirrje për të ndihmuar të krishterët në Irak e në Turqi.
(20.07.2007 RV)Sot në Vatikan përfunduan
punimet e takimit dyditor semestral të ROAKOS-ë siç quhet shkurtimisht Bashkimi i
Veprave të Asistencës për Kishat Lindore. Sivjet në qendër të vëmendjes ishte Lindja
e Mesme: të krishterët irakianë, Turqia e Toka Shenjte, vende gjithnjë të rrezikuara
nga konfliktet. Por në plan të parë ishte diskutimi mbi mundësitë për t’i ndihmuar
të krishterët e Irakut, që sot ndodhen në gjendje vërtetë të vështirë, gjë që e shtyu
Patrikun Emanueli III Deli të ngrejë me forcë zërin, për të tërhequr vëmendjen e mbarë
botës drejt vendit ku secili lufton për interesat personale e ku vijon persekutimi
i mirëfilltë i të krishterëve, fare të pambrojtur Ta dëgjojmë këtë thirrje të
Patrikut të Bagdadit, që i drejtohet çdo të krishteri, në mikrofonin e Radio
Vatikanit: “U kërkoj të gjithëve të luten për ne e të bëjnë ç’të munden për të
zgjuar vetëdijen e botës, por veçanërisht u bëj thirrje Konferencave ipeshkvnore të
mbarë botës, t’i ndihmojnë irakianët. Pra këtë kërkoj: lutje e zgjim të ndërgjegjeve,
për të mbrojtur të drejtat e njeriut të sivëllezërve në Irak. Ne e kemi kryer detyrën
tonë ndaj atdheut. Irakut, por tani ka ardhur koha të kërkojmë respektimin e të drejtave
tona. Secili nga ne ka përgjegjësi para Zotit për të mbrojtur vëllaun, e jo vetëm
në këndvështrimin e fesë së cilës i përket, por edhe duke e parë si bir të Zotit.
Për këtë ngre zërin, me dëshirën që ta dëgjojë mbarë bota, ta dëgjojnë të gjitha institucionet
e OKB-së, të BE-së, të Këshillit të Sigurimit, të FAO-s, që edhe ata të bërtasin sa
të dëgjojë mbarë bota e të mësojë kështu se irakianëve duhet t’u respektohen të drejtat,
të gjithë irakianëve, myslimanëve e të krishterëve, sepse sot këto të drejta në Irak
nuk respektohen”. E britma e Patrikut Emanuel III Deli nga Roma, na kujton se
situata është e vështirë jo vetëm për të krishterët e Irakut, por edhe për ata të
Turqisë, siç shpjegoi sot, gjatë diskutimit të tij në takimin e ROAKO-së, kryeipeshkvi
i Izmirit, Smirnës së lashtë, imzot Rugjero Françeskini, kryetar i Konferencës
ipeshkvnore turke: “Është një situatë - si të themi- pak e keqësuar. Pas vizitës
së Benediktit XVI u krijua një farë atmosfere miqësore, u forcuan lidhjet; por tani,
duke u afruar zgjedhjet për parlamentin dhe presidentin e Republikës, që do të mbahen
më 22 qershor, klima është ngarkuar përsëri me tension, aq sa të arrihet edhe në ndeshje
fizike. Ne urojmë që vendi të gjejë një vijë laike, e cila pranon e respekton të gjitha
entitetet fetare të pranishme në Turqi. Por nuk mund të themi se nuk ndjehet rreziku
i fondamentalizmit islamik, fanatizmi më i keq, në sa nuk mund të fshihet edhe një
rrezik tjetër, ai i mundësitë së një grushti shteti”.