(18.06.2007 RV)Në Irak, forcat e koalicionit kanë vrarë 20 kryengritës gjatë
orëve të fundit. Milicët ishin të përfshirë në kontrabandën e armëve me Iranin. Ndërkaq,
në Bagdad u lirua pas 12 ditësh, atë Hani Abdel Ahad, siç konfirmon për agjensinë
komboniane Misna, imzot Shlemon Varduni, ipeshkëv ndihmës i Bagdadit. Fatkeqësisht,
rrëmbimi i priftërinjve katolikë në Irak bëhet thjesht për qëllime fitimi, e nga kjo
pikëpamje, asgjë nuk ka ndryshuar për të krishterët. Shumë zona të vendit po bëhen
tepër të rrezikshme për ta, duke i detyruar të largohen e të mërgojnë në vende të
tjera. Kërcënimet me vdekje nuk mungojnë as për ata myslimanë që mundohen të ndihmojnë
të krishterët.
Bashkësia ndërkombëtare shqetësohet për ngjarjet e fundit
në Afganistan, ku gjatë një sulmi kundër një xhamie, humbën jetën 7 fëmijë. Sipas
shpjegimit të komandës amerikane, sulmi u bë pas lajmeve të njëpasnjëshme se në xhami
ishin strehuar terroristë të Al Kaidës, të cilët për fat të keq, i kanë përdorur fëmijët
si mbrojtje. Ndërkaq, më 2 e 3 korrik, do të zhvillohet në Romë një konferencë mbi
shtetin ligjor në Afganistan, ku do të flitet për reformën e drejtësisë.
Surprizë,
turni i ballotazhit në zgjedhjet legjislative të Francës. E djathta e presidentit
Nikolas Sarkozì fiton, por jo aq sa mendohej, madje humb rreth 60 vende në parlament
në krahasim me të mëparshmin. E majta, që shpresonte vetëm të ruante 149 vendet e
veta, në të vërtetë kapërcen 200-shin. Në ballotazh ka humbur ministri i ekologjisë,
Alan Zhypè, i cili ka dhënë dorëheqjen. “Afrika për jetën. Pa dënim
me vdekje”. Me këtë parrullë u mblodh sot në Romë Konferenca II ndërkombëtare
“Afrika for life”, organizuar nga Bashkësia e Shën Egjidit. Evropa është kontinenti
i parë pa dënim me vdekje, por ajo që po bën hapa të shpejtë përpara në këtë drejtim
është pa dyshim, Afrika. 14 vende afrikane e kanë hequr dënimin me vdekje, ndërsa
24 nuk e zbatojnë më që prej 10 vjetësh. Po sot, ministrat e jashtëm të Bashkimit
Evropian arritën një marrëveshje për paraqitjen e projektrezolutës mbi pezullimin
e dënimit me vdekje në të gjithë botën, në sesionin vjeshtor të Asamblesë së përgjithshme
të OKB-së.