“Gjithçka niset nga Hyji e kthen tek Hyji” – Ati i Shenjtë thekson mesazhin e Shën
Françeskut në takimin me klerin e rregulltarët.
(17.06.2007 RV)Pasdite, në katedralen
e Shën Rufinit, Ati i Shenjtë u takua me klerin e me rregulltarët, me të cilët reflektoi
kryesisht për kthimin e Shën Françeskut dhe për detyrat kryesore të jetës së tyre
rregulltare. Si u kujtoi se kthimi i parë i Shenjtit fillon me dhuratën e Pagëzimit,
i porositi të tregojnë vëmendje të posaçme për përmasën e Sakramentit fillestar të
krishterë në rrugën e shenjtërisë. “Miliona shtegtarë kalojnë nëpër këto rrugë,
të tërhequr nga karizma e Shën Françeskut – kujtoi Papa - dhe në vijim nënvizoi
se këta njerëz duhen ndihmuar të kuptojnë atë që është themelore për jetën e krishterë
e të synojnë majën e saj më të lartë, shenjtërinë. Nuk mjafton ta admirojnë Françeskun:
përmes tij duhet të takojnë Krishtin, për ta dëshmuar pastaj, e për ta dashur me “fe
të fortë, shpresë të sigurtë e përvujtëri të plotë” siç lutej Françesku para të Kryqëzuarit.
Më pas, duke krahasuar fenë e Shenjtit me fenë e të krishterëve të kohës sonë,
Papa vërejti se besimtarëve të sotëm u duhet të përballojnë një situatë në të cilën
ndjehet fort prirja për të pranuar një Krisht të zvogëluar, që admirohet për humanitetin
e jashtzakonshëm, por nuk pranohet në misterin e thellë të hyjnisë së tij. Edhe vetë
Shën Françesku pësoi një fare gjymtimi, kur nisi të merrej me kënaqësitë e kësaj bote,
duke harruar rrugën më të mirë, atë që do të bëhej zemra e jetës së tij, Krishtin.
Prandaj në Azisi ndjehet nevoja për një vijë baritore, nga e cila duhet të përftojnë
sa më shumë të gjithë ata që jetojnë e kalojnë nëpër këtë tokë hiri, në të cilën flasin
edhe gurët, duke i përcjellë kalimtarit mesazhin e paqes e të mirësisë – theksoi Benedikti
XVI, për të vijuar pastaj, me kujtimin e lidhjes së ngushtë të Gjon Palit II me Qytetin
e Shën Françeskut, i cili u bë edhe më i njohur në mbarë botën si Qytet i dialogut
e i paqes e që prandaj nuk duhet ta harrojë kurrë çka ishte themelore në përshpirtërinë
e Shenjtit: “Për Françeskun gjithçka niset nga Hyji e kthehet tek Hyji. Lavdërimet
e tij drejtuar të Tejetlartit Zot, na zbulojnë një shpirt të rrëmbyer në dialogun
me Trininë Shenjte, që lidhet ngusht me Krishtin në Eukaristi” – tha Papa, e në
vijim kujtoi se edhe lidhja e Shenjtit me natyrën s’është tjetër, veçse kundrim i
Krijuesit në bukurinë e krijesave. Deri urimi i tij për paqe, merr formën e lutjes:
“Zoti të dhëntë paqe”, sepse Françesku është njeri që jeton për të tjerët, pra, njeri
i Zotit. Ta ndash përmasën horizontale të mesazhit të tij, nga ajo vertikale, do të
thotë ta tjetërsosh Shën Françeskun. Duke ua paraqitur Shenjtin si shembull përherë
aktual, që meriton të ndiqet, Papa u kërkoi klerikëve e rregulltarëve të Asizit ta
kumtojnë fenë e krishterë në atë lartësi që kërkojnë sfidat e botës së sotme e në
unitet të plotë me Kishën universale. Vizita e Benediktit XVI në Asizi përfundoi
në bazilikën e Shën Marisë së Engjëjve, ku Papa u gjunjëzua në kapelën e Porciunkolës
e pastaj u takua me të rinjtë në sheshin para bazilikës madhështore, takim i rëndësishëm,
që meriton shumë më tepër hapësirë, nga sa na lejon emisioni i sotëm. Prandaj për
këtë takim, që nisi me kujtimin e ‘Legjendës së tre shokëve’, e cila na kujton
menjëherë të rinjtë e ditëve tona, të rrezikuar për të humbur rrugën e vërtetë të
jetës, do të flasim më gjërë në emisionin e ardhshëm.