(15.06.2007 RV)Jemi në muajin qershor
që, sipas traditës, i kushtohet Zemrës së Krishtit. E pikërisht sot kremtohet solemniteti
kushtuar Zemrës Shenjte të Zotit, nga e cila vijon të burojë një ftesë që u drejtohet
të gjithë njerëzve: ftesa për ta njohur më shumë dashurinë e Zotit, i cili na desh
deri në fund të fundit. Për këtë flet, në mikrofonin tonë, kardinali Frensis Arinze,
prefekt i Kongregatës për kultin hyjnor e disiplinën e sakramenteve:“Solemniteti i
Zemrës së Krishtit është festa e dashurisë së Zotit, që dëftohet në Jezusin, siç shkruan
Shën Gjoni Ungjilltar në kapitullin e tretë të Ungjillit. Zoti e deshi aq shumë botën,
sa të dhuronte Birin e tij të vetëm, kështu që kush beson në Të, të mos dënohet, por
të ketë jetën e pasosur. Zemra e Krishtit është përmbledhja e gjithë dëftimit të
Zotit; e Jezu Krishti, biri i mishëruar i Zotit, është vetë shprehja e dashurisë së
Zotit për mbarë njerëzimin. Jezusi na do, duke na e dëftuar këtë posaçërisht me mishërimin
e tij, me jetën e tij, me mësimin e tij, me mrekullitë, por sidomos, me misterin e
Pashkëve, dmth me mundimet, vdekjen e ngjalljen e tij, që është në qendër të asaj
që ne kremtojmë në Meshë. Jezusi na dhuron korpin e vet, nuk i mjafton ta ftojë Kishën
të bashkohet me të, për të dhuruar vetveten në Meshë. Krishti na ushqen të gjithëve
me korpin e vet, na jep të pijmë gjakun e vet, e megjithatë mbetet një e i pandarë.
Ai na dhurohet, e lë veten në duart tona, ndonëse e di se mund të bjerë në duar njerëzish
që nuk e njohin, njerëzish që bëjnë sakrilegj kur e marrin, duke qenë me mëkate mortare
në zemër, njerëzish që duket sikur e pranojnë, por që në të vërtetë e njohin pak
e e marrin kungimin në dorë si të ishte ndonjë copë biskoti ose buke. Kjo është shumë
e rëndë. Krishti na do, e jo vetëm me Eukaristinë, por edhe me Kishën, me dhuratën
e Kishës, sepse Eukaristinë e gjejmë në Kishë: pra, pa Kishë nuk ka Eukaristi e pa
Eukaristi nuk ka Kishë; e Jezusi na dhuron edhe Nënën e tij. Atëherë themi se dhuratat
e Zemrës së Krishtit janë tri: dhurimi i vetvetes në Eukaristi, Kisha e Nëna e Tij,
Zoja e Bekuar. E ç’mund të na dhuronte më shumë?".