Benedikti XVI - pjesëmarrësve të shkollës verore të Observatorit astronomik të Vatikanit:
‘Kisha inkurajon e promovon kërkimet shkencore’.
(11.06.2007 RV)Me veprimtarinë
e tij, Observatori i Vatikanit shpreh dëshirën e Kishës për promovimin e studimeve
shkencore: këtë pohoi Papa në audiencën e sotme me pjesëmarrësit e sesionit XI të
shkollës verore të Observatorit vatikanas, që nisi sot në Kastel Gandolfo. Shkollën,
që do të zgjasë një muaj – shpjegoi drejtori i saj, ati jezuit Hosè Funes, do ta ndjekin
26 shkencëtarë të rinj, nga 22 vende të ndryshme të botës, 14 prej të cilëve, nga
vendet në rrugë zhvillimi. “Që nga themelimi i saj më 1891 – pohoi Benedikti
XVI – Observatori vatikanas shprehu dëshirën e Kishës për të filluar, për të inkurajuar
e për t’i çuar më tej studimet shkencore, me bindjen se feja e arsyeja janë dy krahë,
që e ndihmojnë njeriun të lartohet drejt kundrimit të së Vërtetës”. Etërit
jezuitë, që e drejtojnë Observatorin astronomik vatikanas – vijoi Shenjtëria e Tij
– janë jo vetëm aktivë në kërkimet shkencore astronomike, por edhe të gatshëm për
t’i ndihmuar breznitë e reja të astronomëve, si po bëjnë sivjet me shkollën e re,
që do të studiojë planetet jashtë sistemit diellor. Në përfundim të audiencës, Ati
i Shenjtë uroi që kjo bashkësi e vogël ndërkombëtare të bëhet simbol i një bashkëpunimi
më të gjërë shkencor, për të mirën e mbarë njerëzimit.