(08.06.2007 RV)2 autobomba shpërthyen sot pranë Basrës, duke shkaktuar 16 të
vdekur e 35 të plagosur. Në afërsi të Kirkukut, atentate në një xhami kanë shkaktuar
vdekjen e 18 personave dhe plagosjen e 16 të tjerëve. Disa prej viktimave janë fëmijë.
Në Bakuba janë vrarë 14 persona brenda shtëpisë së kreut të policisë dhe janë marrë
peng 4 fëmijët e tij. Në Bagdad janë gjetur 34 kufoma, duke e çuar përtej 100-ës numrin
e personave pa jetë të gjetur gjatë tri ditëve të fundit. Pa një marrëveshje ndërmjet
fraksioneve gjendja nuk mund të përmirësohet. Bëhet ndërkaq gjithnjë e më e vështirë
gjendja e të krishterëve, të detyruar të largohen. Është një eksod që e ka zvogëluar
bashkësinë e krishterë nga gjysëm milion në vitin 2003 në pak më shumë se 20 mijë
vetë, në ditët e sotme. Sot, një plan politik i diskutueshëm parashikon përqëndrimin
e bashkësisë së krishterë në një zonë autonome në Pllajën e Ninives. Prefekti i Kongregatës
për Kishat Lindore, kardinali Injac Musa I Daud deklaroi se takimi i nesërm ndërmjet
presidentit amerikan Bush dhe Papës Benedikti XVI do të jetë rasti për të folur edhe
mbi këtë problem. Në Irak, denoncon prelati, shumë të krishterë janë viktima të kthimit
të detyrueshëm në fenë islamike, viktima rrëmbimesh e vrasjesh.