Dashuria universale e Krishtit është burim i çdo veprimtarie bamirëse: kështu u shpreh
Papa në audiencën me pjesëmarrësit e Asamblesë së 18-të të përgjithshme të Caritas
Internationalis.
(08.06.2007 RV)‘Koncepti i vërtetë
i caritas, na çon në zemrën e Kristianitetit, në ‘Zemrën e Krishtit’: ky është
thelbi i reflektimit të Benediktit XVI në takimin me pjesëmarrësit e Asamblesë së
18-të të përgjithshme të Caritas Internationalis, të cilët i priti sot në Vatikan.
Në fjalimin e tij, si theksoi se dashuria e Krishtit duhet të jetë në qendër të çdo
veprimtarie bamirëse, Ati i Shenjtë i drejtoi një përshëndetje të posaçme kardinalit
Oskar Rodriguez Maradiaga, i cili të martën e kaluar u zgjodh kryetar i Caritas Internationalis.
Në audiencë ishte i pranishëm edhe kryetari i Këshillit Papnor ‘Cor Unum’, kryeipeshkvi
Paul Jozef Kordes. Në impenjimin e organizatave si Caritas Internationalis, shikojmë
frytet e dashurisë së Krishtit. Këtë nënvizoi Benedikti XVI, duke ripohuar, në vijim,
se detyra kryesore e entit bamirës është ta mbështesë Kishën në misionin e saj për
ta bërë dashurinë e Zotit të pranishme kudo. Prandaj – shpjegoi Papa– veprimtaria
e Caritas Internationalis nuk është thjeshtë punë që kryhet në emër të Kishës, por
pjesë përbërëse e vetë Kishës. Theksoi, kështu, kuptimin e dashurisë së krishterë,
që duhet t’u prijë gjithnjë veprimtarive të Caritas Internationalis: “Çdo vepër
bamirësie – vërejti Benedikti XVI – duhet të frymëzohet nga përvoja personale
e fesë, që na prin në zbulimin e dashurisë së Zotit. Kush punon në Karitas – vijoi
Ati i Shenjtë – duhet të jetë dëshmitar i kësaj dashurie para botës. Kujtoi,
kështu, se dashuria e krishterë i kapërcen caqet e aftësisë natyrore për të dashur.
Shën Pali e quan virtyt teologjik. Atëherë është e nevojshme që ndihma humanitare
të lidhet ngusht me përvojën personale të fesë, duke u shndërruar kështu në pjesë
të pandarë të dhuratës që u bëhet të varfërve. “Veprimtaria bamirëse bëhet gjest
vërtetë i denjë për njeriun, që është krijuar sipas shembëlltyrës së Hyjit, vetëm
atëherë kur njësohet me dhurimin e krishterë të vetvetes – kujtoi Papa. Ta jetosh
bamirësinë – vijoi Ati i Shenjtë - do të thotë të ecësh në rrugën e shenjtërisë, ashtu
si shumë shërbëtorë të të varfërve, që Kisha i ka lartuar në nderimet e elterit. Më
pas, Benedikti XVI foli për universalitetin e dashurisë së krishterë: “Dashuria
e Zotit – tha Papa – i ofrohet gjithkujt, prandaj bamirësia e Kishës është qëllim
universal e duhet të përfshijë edhe impenjimin për drejtësi shoqërore. Megjithatë
– kujtoi Papa – ndryshimi i strukturave të padrejta nuk mjafton për të siguruar lumturinë
e njeriut. Duke ripohuar më pas, atë që pati theksuar gjatë shtegtimit të tij apostolik
në Brazil, Benedikti XVI nënvizoi edhe një herë se Kisha nuk merret drejtpëdrejtë
me politikë: “Misioni i saj – tha Papa – është të promovojë zhvillimin
e gjithanshëm të njeriut. Prandaj, sfidat e mëdha të botës së sotme, që nga globalizmi,
tek padrejtësitë shoqërore, nuk mund të përballohen e as të kapërcehen, në se vëmendja
nuk përqendrohet tek nevojat më të rëndësishme të njeriut: tek mbrojtja e dinjitetit
të tij e, në fund të fundit, tek shëlbimi i amshuar. Në vijim Shenjtëria e Tij
shprehu kënaqësinë për veprimtarinë e zhvilluar nga 150 organizatat kombëtare, që
bëjnë pjesë në Caritas Internationalis. Inkurajoi, kështu, punonjësit e Karitaseve
të vijojnë misionin e tyre për përhapjen e dashurisë së Krishtit, që të gjithë të
kenë jetë e ta kenë me begati. Kujtojmë se punimet e Asamblesë së përgjithshme të
Caritas Internationalis vijuan pasdite me miratimin e mesazhit përfundimtar e se,
pas kryetarit të ri, dje u zgjodh edhe sekretari i ri i përgjithshëm: është drejtori
ndërkombëtar i Karitasit të Anglisë e të Uellsit, Lesli-En Najt.