(07.06.2007 RV)Kosova ka qenë çështje dreke në mbledhjen e G8-ës në Heiligendam
të Gjermanisë, ku problemet kryesore mbeten respekti për ambientin dhe ekuilibri strategjik
botëror. Përsa i përket Kosovës, qëndrimet janë të ndryshme dhe dallimet, sidomos
ndërmjet qëndrimit rus dhe atij amerikano-evropian, mbeten. Mbi të është diskutuar
edhe në takimin e presidentit amerikan Xhorxh Bush me kryeministrin britanik Toni
Bler. Këshilli i Sigurimit të OKB-së pret përfundimet e mbledhjes së G8-ës për të
vendosur se kur duhet folur mbi rezolutën e re për Kosovën. Përsa i përket klimës,
pavarësisht se nuk ka marrëveshje për masën e reduktimit të gazeve që ndotin atmosferën
duke sjellë fenomenin e ngrohjes së planetit, është arritur në kompromisin që deshën
SHBA-të. Uashingtoni dhe vendet e tjera të G8-ës e njohën efektin serë si problem
dhe pranuan në parim se duhen reduktuar në mënyrë drastike gazet ndotës në atmosferë,
por pa caktuar objektiva. Po në parim, SHBA-të kanë pranuar se reduktimi i këtyre
gazeve në masën 50% deri në vitin 2050 është një objektiv i rëndësishëm. Sipas presidentit
amerikan Xhorxh Bush, për të caktuar një strategji të përbashkët në këtë drejtim,
duhen përfshirë edhe vende si Kina e India e nuk mjaftojnë vetëm tetë vendet e mbledhura
në Gjermani. SHBA-të janë gati të marrin përsipër madje, organizimin e një konference
post-Kioto me pjesëmarrje të gjerë, e cila duhet të vendosë strategjinë e ardhshme.
Sipas rezolutës përfundimtare mbi problemin e klimës, kjo konferencë duhet organizuar
brenda vitit 2009, nën ombrellën e OKB-së. Ironi e fatit, kjo mbledhje e G8-ës
në Gjermani është më e shtrenjta dhe më problematikja për nga ndotja e atmosferës
në të gjithë historinë e takimeve të tilla. Do të kushtojë 100 milion euro dhe do
të prodhojë 30 mijë ton dioksid karboni, gazi përgjegjës për efektin serë.