Mbi thirrjen e Papës – koment i imzot Bigucit nga Sierra Leone.
(06.06.2007 RV)Mbi rëndësinë e
thirrjes së Papës drejtuar G.8, që t’i mbajë premtimet për kooperimin dhe zhvillimin,
të ndjekim komentin e imzot Gjorgjio Bigucit, ipeshkëv i Makenit, në Sierra Leone,
në mikrofonin e Radios sonë: Përgjigje: - Është shumë e rëndësishme, sepse
zëri i Papës dëgjohet në mbarë botën e, prandaj, do të arrijë sigurisht edhe tek anëtarët
e G.8. E ne urojmë që nga G.8, mbi të gjitha, të mbahen premtimet që janë bërë herët
e tjera, por që me sa duket, nuk janë mbajtur. Pyetje: - Një nga detyrat
kryesore, që thekson Papa, është pikërisht ajo e arsimit fillor… Përgjigje:
- Pa tjetër, ne këtu e jetojmë për ditë këtë situatë në Sierra Leone, në Afrikën
perëndimore, ku akoma 70% e popullsisë është analfabete. Sigurisht kjo është pika
numër një. Por, për fat të keq, po na thonë se Fondi monetar e Banka botërore qenkan
të mendimit që këtu të pakësohet numri i mësuesve, e kjo po ndodh nga pak në të gjitha
vendet e Afrikës subsahariane. Pyetje: - Një nga problemet e mëdha të Afrikës
është ai i paqes dhe i sigurisë, që nuk po arrihen kurrë, ndonëse flitet aq shumë
për to… Përgjigje: - Lidhet pikërisht me mungesën e zhvilimit, me varfërinë,
me mungesën e drejtësisë, e edhe me korrupsionin. Por, nganjëherë, më duket se kjo
u shkon shumë për shtat qeverive të Perëndimit. Pyetje: - Përballë kësaj
situate, ç’qëndrim mban Afrika sot: është e zhgënjyer, e pashpresë, apo shpreson akoma
në ndihmën e vendeve më të zhvilluara ekonomikisht?Përgjigje: - Në të vërtetë,
përzjehen të dyja: nga njëra vërejmë hidhërimin për faktin se premtimet nuk përkojnë
aspak me faktet, por nga ana tjetër, Afrika është Kontinenti i shpresës, që nuk vdes!