(06.06.2007 RV)Fillon së mbrapshti takimi i G8-ës në Gjermani. Dihet që në
fillim se komunikata përfundimtare mbi klimën nuk do të fiksojë objektiva afatgjatë
mbi reduktimin e gazeve përgjegjës për efektin serë, apo ngrohjen e tepruar të atmosferës.
Kështu të paktën deklaroi delegacioni i SHBA-së, pak orë para fillimit të G8-ës, duke
hedhur poshtë krejt propagandën e presidentit Bush, të cilit dëshira për të kontribuar
në përmirësimin e cilësisë së ajrit që thithim i zgjati aq kohë sa ishte e nevojshme
për të zënë faqet e para të gazetave. Kancelarja gjermane, Angela Merkel do të propozojë
reduktimin e gazeve ndotës të atmosferës në masën 50% brenda vitit 2050, por këshilltari
i presidentit Bush për ambientin bëri të ditur se SHBA-të “nuk janë gati ta pranojnë
një propozim të tillë”. Të vështira edhe temat e tjera në rendin e ditës: Lindja
e Mesme, Darfuri, mbrojtja me raketa, por edhe ballafaqimi i nesërm Bush – Putin.
Pas akuzave të djeshme ndaj demokracisë ruse, sot aleati i përhershëm amerikan në
Evropë, Britania e Madhe bëri të qartë se Brukseli mund t’i minimizojë marrëdhëniet
me Rusinë. Kryeministri britanik, Toni Bler, i cili pas pak ditësh do të lërë postin,
deklaroi në Londër se Evropa është e interesuar të ketë marrëdhënie të mira me Rusinë,
por mbi bazën e “vlerave të përbashkëta”. Gjatë mbledhjes së G8-ës, tha Bler, do të
flitet me letra të hapura me Rusinë.