Papa takon kryeipeshkvin e Siro–Malankarezëve :“Të mbrohet e të ruhet në Indi trashëgimia
e çmuar e Ungjillit”.
(28.05.2007 RV)“Impenjimi
për ugjillëzimin dhe dialogu i frytshëm me fetë e tjera të jugkontinentit indian”:
- ky është objektivi kryesor i Kishës Siro-Malankareze vendase, për të cilin foli
sot Benedikti XVI, duke pritur në audiencë kryeipeshkvin e ri të madh të Trivandrum,
Fortlumturinë e Tij Bazelios Mar Klemis. Papa e konfirmoi zgjedhjen e tij në shkurtin
e kaluar, menjëherë pasi ndërroi jetë Fortlumturia e Tij, Çiril Mar Bazelios. “Tani
është koha e ungjillëzimit të ri, kohë e dialogut të ri, të bindur, me të gjithë vëllezërit
e motrat që besojnë në fenë e krishterë; kohë e takimit plot respekt e fryt ndërmjet
feve e kulturave, për të mirën e të gjithëve e, posaçërisht, për më të varfërit ndërmjet
të varfërve. Impenjimi ynë në ungjillëzim duhet risuar vazhdimisht, sepse ne përpiqemi
të ndërtojmë paqen, në drejtësi e solidaritet, për mbarë familjen njerëzore”. Më
pas, duke kujtuar 75-vjetorin e krijimit të hjerarkisë siro-malankareze, Papa uroi
që kryeidoqeza e Trivandrum dhe Selia e Shën Pjetrit ta pasurojnë reciprokisht njëra-tjetrën,
në frymën universale të Kishës së vetme të Krishtit, duke ruajtur edhe traditat e
veçanta lindore. Kujtojmë se Kerala është një shtet indian i bregut juglindor të Indisë
që numron 20% të krishterë në gjirin e një popullsie prej 32 milionë banorësh. Me
një fjalë, përqindja më e lartë në të gjithë Jugkontinentin. Në këtë zonë Ungjilli
u predikua për herë të parë nga Shën Toma Apostull e vijoi të transmetohej nga breznia
në brezni, deri më sot, kur edhe Kisha Siro-Malankareze duhet të përballojë sfidat
e mijëvjeçarit të tretë të krishterë.