16 мая 2007 г. у Янаве Палескім (г. Іванава Брэсцкай вобласці) адбылася вялікая ўрачыстасць
з нагоды 350-годдзя мучаніцкай смерці св. Андрэя Баболі. На ўрачыстасць у гэты
невялікі гарадок, дзе быў жорстка закатаваны Андрэй Баболя, з’ехаліся пілігрымы з
усіх куткоў Беларусі і Польшчы. Па запрашэнні кардынала Казіміра Свёнтка, які ўзначаліў
урачыстасці, на іх прысутнічалі ўсе каталіцкія біскупы Беларусі, шматлікія святары,
законнікі і законніцы. Дапаможны біскуп Пінскай дыяцэзіі Казімір Велікаселец а
15-й гадзіне распачаў урачыстасць на тым месцы, дзе Андрэй Баболя быў схоплены казакамі.
Цяпер тут стаяць два высокія крыжы — каталіцкі і праваслаўны — і ляжыць вялікі камень
з памятнаю табліцаю. Біскуп распавёў прысутным пра гісторыю жыцця і дзейнасці св.
Андрэя Баболі, пасля чаго былі прачытаныя фрагменты са святога Пісання, спяваліся
песні на ўшанаванне святога мучаніка і апекуна беларускага Палесся і польскай зямлі.
Потым шматлікая працэсія з малітвамі святога Ружанца і спевамі па галоўнай вуліцы
горада прайшла да касцёла Узвышэння Святога Крыжа. А 16-й гадзіне пра жыццё і дзейнасць
апостала Палесся зрабіў даклад кс. др. Ян Саламон, рэктар Міждыяцэзіяльнай вышэйшай
духоўнай семінарыі імя святога Тамаша Аквінскага ў Пінску. А 17-й гадзіне распачалася
ўрачыстая святая Імша, якую цэлебраваў кардынал Казімір Свёнтэк. Касцёл не змог змясціць
усіх вернікаў, таму святая Імша цэлебравалася на ўзведзеным каля храма алтары. У сваёй
гаміліі кардынал распавёў пра гісторыю адшукання рэліквій св. Андрэя Баболі, пра драматычнае
вандраванне знявечанага цела пакутніка, якое вось ужо на працягу трох з паловаю стагоддзяў
застаецца нятленным.
На заканчэнне набажэнства з рук кардынала Казміра
Свёнтка ўсе прысутныя прынялі благаслаўленне святымі рэліквіямі. Вернікі таксама мелі
магчымасць ушанаваць рэліквіі святога мучаніка Андрэя Баболі.