Kishat e Evropës Lindore impenjohen të bashkëpunojnë për zgjidhjen e problemeve të
pas-komunizmit.
(18.05.2007 RV)Përvoja e marrëdhënieve ndërmjet Shtetit e Kishës në vendet
pas-komuniste”: mbi këtë temë diskutuan, pak ditë më parë, në Pragë, kardinajtë e
kryetarët e Konferencave ipeshkvnore të Republikës Çeke, të Kroacisë, Hungarisë, Sllovakisë
e Sllovenisë. Pjesëmarrësit në mbledhje – sipas Agjensisë SIR, folën për situatën
e vendeve të tyre, ndërsa kardinali Miroslav Vlk, kryeipeshkëv i Pragës, duke kujtuar
takimin e mbajtur në vitin 1990 në Varshavë, pohoi: “Sot, pas 17 vjetësh, dëshirojmë
të krahasojmë situatën e atëhershme me të sotmen e të kërkojmë rrugë të reja për
zgjidhjen e problemeve të reja që takojmë në veprimtarinë tonë të përditshme. Imzot
Jan Graubner, kryeipeshkëv i Olomucit e kryetar i Konferencës ipeshkvnore çeke, kujtoi
Ditët mitelevropiane, që u mbajtën në Evropën Qëndrore në vitet 2003- 2004, gjatë
të cilave tetë vende analizuan përvojën e tyre dhe uruan vijimin e bashkëpunimit të
ngushtë për probleme e situata të përbashkëta. Gjatë takimit të Pragës, duke
u ndaluar tek qëndrimi i mjeteve të komunikimit ndaj Kishës në vende të ndryshme të
Evropës Lindore, u theksua se nuk ia vlen t’u jepet përgjigje të gjitha sulmeve e
akuzave kundër Kishës edhe pse kjo i shërben më shumë publicitetit të tyre. Ndërkaq
mjetet katolike të komunikimit, numri i të cilave është në rritje, porositen të jenë
më cilësore e të tërheqin gjithnjë më tepër lexues.