(17.05.07 RV)Fillon nesër në Samara takimi i nivelit të lartë ndërmjet Rusisë
dhe Bashkimit Evropian, ku do të marrin pjesë presidenti rus Putin, kancelarja gjermane
Merkel dhe presidenti i Komisionit Evropian, Barroso. Është hera e parë që nuk do
të nënshkruhet një marrëveshje partnershipi strategjik, tregues i momentit të vështirë
në marrëdhëniet dypalëshe. Polonia ka vendosur veton kundër një marrëveshjeje
bashkëpunimi me Moskën, pas embargos ruse për eksportimin e mishit polak. Sot bëhet
e ditur se ministrja e jashtme polake ka refuzuar të shkojë në Moskë për sqarime.
Tema të tjera të nxehta janë pa dyshim marrëdhëniet e Rusisë me Estoninë dhe çështja
e Kosovës. Nga Samara nuk pritet ndonjë zgjidhje. Takimi do të shihej si i suksesshëm
edhe sikur vetëm të përmirësonte disi marrëdhëniet Bruksel-Moskë.
Me propozim
të delegacionit shqiptar, sesioni i 34-t i Konferencës së Ministrave të Jashtëm
të Konferencës Islamike në Islmabad mori në shqyrtim dhe miratoi me konsensus një
rezolutë mbi Kosovën, ku lavdërohen përpjekjet e komunitetit ndërkombëtar për zgjidhjen
e statusit përfundimtar. Takimi u zhvillua nga 15 - 17 maj në Islamabad të Pakistanit,
ku u mblodhën 57 vendet anëtare, që i dhanë përkrahjen e tyre planit të Ahtisarit.
Në to përfshihen edhe Katari dhe Indonezia, që janë anëtare të Këshillit të Sigurimit
të OKB-së.
Kriminelët e luftës, të kërkuar nga Gjykata e Hagës, gjeneralët
serbë Ratko Mlladiq dhe Radovan Karaxhiq janë në Beograd. Një zëdhënëse e Gjykatës
së Hagës nxit autoritetet serbe t’i kërkojnë dhe t’i gjejnë ata. Olga Kavran, zëdhënëse
e kryeprokurores Karla Del Ponte, sqaron sot për gazetën serbe “Danas” se Haga u ka
kaluar autoriteteve edhe një informacion lidhur me vendndodhjen e Mlladiqit, por në
natën e së martës, policia nuk e gjeti më gjeneralin në shtëpinë e shënuar. Derisa
të plotësojë këtë kërkesë të Gjykatës së Hagës, Serbia do të ketë probleme për integrimin
e saj në Bashkimin Evropian.