Kryeipeshkvi i Asuncionit: mesazhi i Papës në Brazil, thirrje e fuqishme për dashuri
e solidaritet ndaj më të varfërve.
(15.05.2007 RV)Papa i ftoi ipeshkvijtë,
meshtarët, rregulltarët e laikët latinoamerikanë ta gjallërojnë impenjimin e tyre
misionar, duke vënë në qendër të tij Krishtin e Kishën e tij, duke predikuar në mënyrë
të qartë, pa e thjeshtëzuar Ungjillin e dashurisë dhe të vertetën e Hyjit. Prej këndej,
kujtoi se ungjillëzimi lidhet ngushtë me çlirimin e vërtetë të njeriut, të cilin e
ndihmon ta kapërcejë varfërinë morale e shpirtërore, pa rënë në gabimet shkatërrimtare
të ideologjive materialistike, si marksizimi e kapitalizmi. Mbi këtë mesazh të Benediktit
XVI – të ndjekim reflektimin e kryeipeshkvit paraguajan të Asuncionit, imzot Eustakio
Pastor Kokeho Verga në mikrofonin e Radio Vatikanit: Përgjigje: - Besoj
se mesazhi i tij ishte shumë i thjeshtë, i përvujtë, por edhe tepër i rëndësishëm,
ishte thirrje e fortë për dashuri e solidaritet ndërmjet popujve të Amerikës Latine.
E unë besoj se për të varfërit ishte një mbështetje shumë e fortë: e kjo është tepër
pozitive për këtë kohë. Për ne, që jemi mbledhur në Konferencën V të ipeshjkvijve
të Amerikës Latine e të Karaibeve, ishte mesazh jashtëzakonisht i rëndësishëm, që
na tregon rrugën e reflektimit gjatë këtyre 20 ditëve të punimeve. Pyetje: -
Papa vuri theksin mbi temën e Konferencës: misionaritet, dishepullàt, ungjillëzim
i ri: një sfidë për Kishën e Amerikës Latine, apo jo? Përgjigje: - Natyrisht!
Besoj se duhet të bëjmë një punë më të mirë, në krahasim me të kaluarën. Ungjillëzimi
duhet të depërtojë më në thellësi të popullatës. Edhe Papa e vlerësoi shumë pozitivisht
përshpirtërinë popullore, por na ngarkoi të gjithëve me detyrën të ugjillëzojmë më
në thellësi të kësaj përshpirtërie popullore të Amerikës Latine, që është vërtetë
thesar për këtë Kontinent; por ne tani e kemi për dertyrë ta përtrijmë ungjillëzimin
në këtë epokë ndryshimesh: në kulturë, në shoqëri, në botën ekonomike, politike…