Në Aparesida Benedikti XVI ftoi të vihet në qendër të jetës Jezu Krishti, për të
ndërtuar një shoqëri të drejtë, duke iu shmangur gabimeve shkatërrimtare të marksizmit
e të kapitalizmit.
(14.05.2007 RV)Dje paradite, dy orë pas Meshës para Shenjtërores së Aparesidës,
gjatë kremtimit të lutjeve mbrëmësore, Benedikti XVI hapi, me një fjalim magjisterial,
Konferencën V të përgjithshme të episkopatit latinoamerikan e karaibik. Në përshëndetjen
e tij, kryetari i Konferencës së episkopatit të Amerikës Latine e të Karaibeve (CELAM)
kardinali Françisko Havier Errazuriz Osa, e siguroi Atin e Shenjtë se të gjithë do
të impenjohen për t’i dhënë një hov të ri misionar Kishës së Kontinentit, në të cilin
jeton thuajse gjysma e katolikëve të mbarë botës. Nga ana e tij, Ati i Shenjtë
i dhuroi kardinalit një triptik të shkëlqyer, që kishte në qendër Ngjitjen e Zotit
në qiell, ndërsa në të dy anët, Jezusin me nxënësit e vet dhe figurën e Shën Huan
Diegos së Guadalupes. Por, të kthehemi përsëri tek fjalimi më i rëndësishëm i
Benediktit XVI, ai i hapjes së Konferencës ipeshkvnore latinoamerikane e karaibike.
Nga Aparesida – i dërguari i posaçëm i Radios sonë, Alesandro Gjizoti: “Ungjillëzimi
i ri, çështja sociale, tema e veprimtarisë misionare në gjurmët e nxënësve të Krishtit,
por edhe mbrojtja e familjes, puna baritore me rininë, roli i shekullarëve... Në
fjalimin drejtuar Konferencës ipeshkvnore të Amerikës Latine e të Karaibeve, Benedikti
XVI preku të gjitha pikat kyçe të problemeve, me të cilat do të ndeshet Kisha e këtij
Kontinenti në vitet e ardhshme. Mbi të gjitha, Papa kujtoi se është takimi me Krishtin
në Eukaristi, qendër e jetës së krishterë, që e nxit impenjimin e ungjillëzimit dhe
i jep shtytje solidaritetit. Sólo de la Eucaristía brotará la civilización del
amor… “Vetëm nga Eukaristia – tha Papa – do të bulojë qytetërimi
i dashurisë, që do ta shndërrojë Amerikën Latine aq, sa të bëhet jo vetëm Kontinent
i shpresës, por edhe Kontinent i dashurisë!”. Besimi në Zotin – vijoi Ati i
Shenjtë – e ka gjallëruar jetën dhe kulturën e këtyre vendeve. Prandaj besimtarët
katolikë duhet të bëhen gjithnjë më të vetëdijshëm për përgjegjësitë e tyre si “nxënës
e misionarë të Krishtit”. Pues ser discípulos y misioneros de Jesucristo… “Të
jesh nxënës e misionar i Jezu Krishtit”- vërejti Shenjtëria e Tij – do të thotë
t’i kesh rrënjët në Të”. Por – vijoi të shpjegonte Papa - ta vësh Krishtin në
qendër të jetës, nuk do të thotë të largohesh nga problemet e mëdha ekonomike, shoqërore
e politike të Amerikës Latine, për t’u mbyllur plotësisht në botën shpirtërore. Nënvizoi,
më pas, gabimin e madh të prirjeve që mbisunduan shekullin e fundit, gabim shkatrrimtar,
siç e tregojnë pasojat si të sistemeve marksiste, ashtu edhe të atyre kapitaliste.
Vetëm ai që pranon Zotin – shtoi Papa – mund të japë përgjigje të përshtatshme e realisht
njerëzore. Benedikti XVi u ndal edhe tek problemet shoqërore të Amerikës Latine: Los
pueblos latinoamericano y caribeños tienen drecho a una vida plena… “Popujt
e Amerikës Latine e të Karaibeve” – tha Papa Racinger – kanë të drejtë ta jetojnë
plotësisht jetën e tyre, të lirë nga kërcënimet e urisë e të çdo forme të dhunës.
E, që kjo të bëhet realitet, duhet të hyjnë në rrugën e zhvillimit të vërtetë që e
kufizon pabarazinë e madhe shoqërore. Por, si mund t’i përgjigjet Kisha sfidës së
varfërisë? – pyeti Papa. Kapitalizmi e marksizmi – vijoi të theksonte – premtuan se
do ta gjenin rrugën për krijimin e strukturave të drejta. Por koha tregoi se ky premtim
ideologjik, ishte i rremë. E të njëjtën gjë shikojmë edhe në perëndim, ku vijon të
thellohet hendeku ndërmjet të varfërve e të pasurve. Atëherë janë të nevojshme vlerat
universale por, në se mungon Zoti – vërejti Shenjtëria e Tij - këto vlera e humbasin
një pjesë të mirë të forcës së tyre. E këto fjalë u pasuan nga një reflektim: Si
la Iglesia comenzara a transformarse directamente en sujeto politico… “Në se
Kisha do të shndërrohej në subjekt politik , nuk do të bënte më shumë për të varfërit
e për drejtësinë, por do të bënte më pak, sepse do ta humbiste pavarësinë dhe autoritetin
moral, duke u njëjtësuar me një rrugë politike e me një pozicion të pjesshëm e të
diskutueshëm. Kisha – shtoi Benedikti XVI – është avokate në mbrojtje të drejtësisë
të të varfërve, pikërisht sepse nuk identifikohet me politikanët e as me interesat
partijake. Vetëm duke qenë e pavarur, mund t’i orientojë ndërgjegjet dhe të ofrojë
opcione jete, që i kapërcejnë caqet e fushës politike. Familja, pasuri e njerëzimit
– vijoi të nënvizonte Ati i Shenjtë - përbën një nga thesaret më të rëndësishme të
vendeve latinoamerikane. Fjalimi plot pasion e hollësira i Papës Racinger, përfundoi
me një thirrje prekëse: “Rri, o Zot, me ata që, në shoqëritë tona, janë më të ligshtit;
rri me të varfërit e me të përvujtët, me indianët e afroamerikanët. Rri, o Zot, pranë
fëmijëve e të rinjve, që janë shpresa e pasuria e Kontinentit tonë”.