Benedikti XVI i ftoi të rinjtë të jenë protagonistë e apostuj të një shoqërie më të
drejtë e më vëllazërore.
(11.05.2007 RV)Mbrëmë, në orën 18. 00 me orën vendase, 23. 00 me orën evropiane,
Benedikti XVI u takua me të rinjtë e Brazilit. Lajtmotivi i homelisë që mbajti
gjatë këtij takimi në formën e Liturgjisë së Fjalës së Zotit, ishte “Në se do të jesh
i përsosur, shko, shit çka ke, faljau të varfërve… pastaj eja e më ndiq mua!” Papa
u shpjegoi të rinjve se ndodhet në Brazil, për të hapur Konferencën V të episkopatit
latinoamerikan që, sipas dëshirës së tij, do të mbahet në Aparasida, pranë Shenjtërores
së Zojës së Bekuar. Më pas kujtoi se një vit më parë, në asamblenë e tyre të përgjithshme,
ipeshkvijtë e Brazilit reflektuan rreth temës së ungjillëzimit të rinisë, duke u dhënë
në dorë të rinjve një dokument të rëndësishëm. Ndërsa në këtë asamble iu kthyen së
njëjtes temë, të pasuruar me bashkëpunimin e vetë të rinjve, me dëshirën që reflektimet
e bëra dhe orientimet e propozuara të shërbejnë si fanar për ndriçimin e rrugës në
të ardhmen. Papa theksoi se provon një gëzim të posaçëm kur takohet me të rinjtë,
duke kujtuar posaçërisht Ditën XX botërore të rinisë, të cilën e kryesoi dy vjet
më parë në Gjermani. Është një kujtim prekës – vijoi të kujtonte Ati i Shenjtë – sepse
pati fryte të begata, dhuratë e vetë Zotit. E fryti më i çmuar ishte vëllazëria shembullore
ndërmjet të rinjve, si dëshmi e dukshme e gjallërisë së përhershme të Kishës për mbarë
botën. Duke e thelluar atmosferën e një dialogu simbolik me të rinjtë, Benedikti
XVI citoi fjalët e Gjon Palit II: “Të rinjtë janë protagonistët e mijëvjeçarit të
tretë, janë ata që do të përcaktojnë fatin e kësaj etape të jetës së njerëzimit”,
shqiptuar gjatë vizitës në Mato Groso, duke i shtuar edhe vlerësimet e veta: “Zoti
e çmon, pa dyshim, jetën tuaj të krishterë në bashkësitë e shumta famullitare dhe
në bashkësitë e vogla kishtare, në universitete, në kolegje e në shkolla e, në mënyrë
të veçantë, në rrugë e në mjediset e punës në qytete e fshatra. Por duhet ecur përpara
- theksoi Papa - dhe shtoi: - Nuk mund të themi kurrë mjaft, sepse dashuria e
Zotit është e pakufishme e Ai na kërkon t’i hapim zemrat tona, në mënyrë që të mbushen
gjithnjë më shumë me dashuri, mirësi e mirëkuptim për të afërmit tonë. Na kërkon të
bëjmë tonat problemet që kanë të bëjnë jo vetëm me bashkëjetesën njerëzore, por edhe
me mbrojtjen dhe ruajtjen e ambientit natyror, në të cilin bëjmë pjesë të gjithë. Pyjet
tona kanë më shumë jetë! – nënvizoi Shenjtëria e Tij, dhe më pas bëri thirrje: “Mos
lejoni të shuhet flaka e shpresës që ju vë në buzë himni juaj kombëtar. Shkatërrimi
ambiental në Amazonë dhe kërcënimet kundër dinjitetit të popullsive të saj, kërkojnë
më tepër impenjim në fusha të ndryshme, sidomos atje ku ka më shumë nevojë shoqëria”. E
nga realiteti brazilian, Benedikti XVI kaloi tek fragmenti i shkëputur prej Ungjillit
të Shën Mateut (Mt. 19, 16-22), i sapo lexuar. Na flet për një djalosh i cili ngarendi
për të takuar Jezusin. Nxitimi i tij meriton të nënvizohet – shpjegoi Ati i Shenjtë.
E kjo, sepse në figurën e djaloshit, pa të rinjtë e Brazilit e të mbarë Amerikës Latine,
që nxituan të takohen me Papën Racinger, për t’i drejtuar të njëjtën pyetje ungjillore:
“Ç’duhet bërë për të fituar jetën e pasosur?”. E Papa nuk mund të mos ndalej tek kjo
pyetje mbi karakterin e mbinatyrshëm të jetës, duke theksuar se vetëm Krishti mund
t’i japë përgjigje, sepse është i vetmi që mund ta sigurojë jetën e pasosur, i vetmi
që mund t’i japë domethënie jetës tokësore e ta mbushë plot me kuptim. Më pas,
duke thelluar këtë argument, Benedikti XVI vijoi të shpjegonte se Jezusi, para se
të japë përgjigje, i drejtohet djaloshit me fjalët: “Pse po më pyet ç’është e mirë?
Në këtë pyetje gjindet kyçi i përgjigjes përfundimtare. Jezusi është i mirë, gjë që
na afron tek ai e na shtyn të përvetësojmë mësimin e këtij Mësuesi të mirë. Kush e
pranon të mirën, do të thotë se di të dashurojë. E kush dashuron – thotë Shën Gjoni,
njeh Zotin. Me këto fjalë, Papa i ftoi të rinjtë ta shikojnë me sy pozitiv jetën,
realitetin e përditshëm, miqësinë e gjithçka i rrethon. Duke u rikthyer tek pyetja
e djaloshit të Ungjillit, Papa nënvizoi: “Jezusi na siguron se vetëm Zoti është
i mirë. Të jesh plot mirësi, do të thotë të pranosh Hyjin. Kështu Ai na fton ta shikojmë
Hyjin në të gjitha sendet e në të gjitha ngjarjet, edhe atje ku shumica shikon vetëm
mungesën e Zotit. Duke parë bukurinë e krijesave e duke vërejtur sa të mira janë,
është e pamundur të mos besosh në Zotin e të mos e provosh praninë e tij shëlbuese
e ngushëlluese. E në se ia dalim mbanesh ta shohim gjithë mirësinë që ekziston në
botë e të provojmë të mirën që vjen nga vetë Zoti, nuk mund të mos përpiqemi me të
gjitha forcat t’i afrohemi sa më shumë, ta lavdërojmë e ta bekojmë”. Por –
shtoi Papa - për ta kuptuar ç’është e mirë, kemi nevojë për ndihmë. E këtë ndihmë
na e jep Kisha, përmes katekizmit, duke e pasur parasysh se vetë Jezusi na tregon
ç’është e mirë për ne e na dhuron kështu katekizmin e parë. Më pas - pyetja: “Po ju,
të rinj të Amerikës Latine, a e keni zbuluar ç’është e mirë? A i ndiqni urdhërimet
e TënZot? A e kuptoni se kjo është e vetmja rrugë drejt lumturisë? Vitet që jetoni,
janë vite që përgatisin ardhmërinë. E nesërmja varet shumë nga mënyra si e jetoni
të sotmen, kohën e rinisë suaj, në cilën shpesh mungon çdo shpresë - vërejti Papa
e, me keqardhje të thellë, foli për rreziqet e shumta e të rënda që kërcënojnë rininë
sot. Prandaj nënvizoi se barinjve u dridhen zemrat, kur dëgjojnë se të rinjtë e sotëm
janë të trembur, se nuk kanë shpresa, se kanë frikë nga vdekja pikërisht në çastin
kur jeta mungullon e përpiqet të gjejë rrugën e drejtë për t’u realizuar plotësisht.
Të rinjtë kanë frikë se do të dështojnë, se nuk do të mund ta gjejnë kurrë kuptimin
e jetës, kanë frikë se do të mbeten mbrapa, për shkak të zhvillimit të vrullshëm të
ngjarjeve e të komunikimeve. Vërejmë se shumë të ri vdesin në lule të moshës – vijoi
Papa - dëgjojmë të flitet për dhunë e për përhapje gjithnjë më të madhe të përdorimit
të drogës, gjë që flet për një rini të përhumbur”. Por, si rreshtoi gjithë këto
kërcënime, Benedikti XVI nënvizoi me forcë se shpresat nuk janë të humbura, se duke
parë vështrimet plot besim e dashuri të të rinjve që ndiqnin takimin, beson se ata
e kanë gjetur rrugën e vërtetë. “Ju jeni të rinjtë e Kishës – pohoi plot
besim Ati i Shenjtë – prandaj ju ftoj të merrni pjesë gjallërisht në misionin për
t’i ungjillëzuar djemtë e vajzat që ravgojnë pa kuptim rrugëve të botës, si delet
pa bari e të jeni apostuj të të rinjve, në mënyrë që edhe ata të zbulojnë rrugët
e sigurta të urdhërimeve e, duke ecur në to, të arrijnë te Zoti”. Papa i ftoi
të rinjtë të jenë protagonistë të një shoqërie të re, duke u frymëzuar nga vlerat
morale universale, por edhe duke u impenjuar për formimin e tyre njerëzor e shpirtëror.
E kjo, sepse një vajzë ose një djalë që nuk janë të përgatitur për t’i përballuar
sfidat reale të jetës së krishterë, mund të bien lehtësisht pré në të gjitha pritat
e materializmit e të laicizmit, që aktivizohen gjithnjë më shumë dhe në të gjitha
drejtimet. Por, sidomos, Shenjtëria e Tij uroi që të rinjtë të jenë protagonistë të
një shoqërie më të drejtë e më vëllazërore, duke kryer të gjitha detyrat ndaj shtetit,
duke respektuar ligjet e tij, duke mos lejuar të rrëmbehen nga urrejtja e nga dhuna,
duke u përpjekur të japin shembullin e tyre si të krishterë në mjediset profesionale
e shoqërore dhe duke u dalluar për ndershmëri në marrëdhëniet shoqërore e profesionale.
“Duhet kujtuar edhe se ambicia e shfrenuar për pasuri e pushtet të çon në rrugën
e korrupsionit vetjak e të tjerëve. Nuk ka asnjë arsye që ta përligjë prirjen për
t’i realizuar aspiratat njerëzore, si ekonomike, ashtu edhe politike, duke ecur në
rrugën e mashtrimit e gënjeshtrës”. Ndërsa për t’i kryer detyrat – i këshilloi
të rinjtë Papa – kërkoni ndihmën e Jezusit në mënyrë që me hirin e tij t’ju hapë rrugën
për të kuptuar madhështinë e Planit që ka për çdo njeri. Në përfundim Benedikti
XVI përsëriti lajmotivin, që përshkoi gjithë homelinë: “Ungjilli na siguron se
ai i riu, që nxitoi ta takonte Jezusin, ishte shumë i pasur. Ta kuptojmë këtë pasuri
jo vetëm në planin material. Mos harroni se vetë rinia është pasuri e posaçme. Duhet
zbuluar e duhet vlerësuar, për të marrë kështu pjesë në misionin e shëlbimit.“Ju
ftoj, prandaj, të mos e shpërdoroni rininë tuaj - tha Papa. Mos kërkoni të
ikni nga ajo. Përkundrazi: ju jeni e sotmja rinore e njerëzimit dhe e Kishës, jeni
fytyra e saj e re. Kisha ka nevojë për ju, për t’i treguar botës fytyrën e Krishtit.
Pa këtë fytyrë Kisha do të paraqitej para botës e shpërfytyruar. Ju jeni pjesë përbërëse
e Kishës e cila pëfaqëson fytyrën e Krishtit në Amerikën Latine - nënvizoi Ati
i Shenjtë dhe, në përfundim, i ftoi të rinjtë të jenë shenjtorë, të ecin në gjurmët
e Krishtit, për t’i dhënë një fytyrë të re edhe Brazilit në këtë fillim të mijëvjeçarit
të tretë të epokës së krishterë.