(08.05.07 RV)Pas 5 vjetësh, Irlanda e Veriut ka një qeveri të re autonome të
formuar nga unionistë dhe republikanë. Kryeministër është protestanti Jan Peisli,
kreu i Partisë unioniste Demokratike ndërsa zëvendësi i tij është katoliku Martin
MekGines, drejtues i lëvizjes republikane “Sin Fein”.
Zëvendëspresidenti
amerikan Dik Çejni fillon sot turneun në Lindjen e Mesme. Qëllimi i turneut është
të kërkojë mbështetje për stabilizimin e Irakut dhe të rrisë presionin diplomatik
ndaj Iranit për programet e tij bërthamore. Çejni do të vizitojë Emiratet e Bashkuara
Arabe, Arabinë Saudite, Egjiptin dhe Jordaninë.
Sekretari i Përgjithshëm
i NATO-s, Jap de Hop Skefer dhe presidenti i Pakistanit, Pervez Musharaf u morën
vesh për forcimin e masave të sigurisë përgjatë kufirit ndërmjet Pakistanit dhe Afganistanit,
me qëllim që të ndalohet kalimi i talebanëve. Ata u takuan sot në Islamabad.
Organizata
për të drejtat e njeriut, Amnesty International akuzon Rusinë dhe Kinën për shkeljen
e embargos së armëve kundër Sudanit. Pekini i hodhi poshtë akuzat duke i cilësuar
"plotësisht të paarësyeshme".