Në Sharm El-Sheik, konferenca ndërkombëtare mbi Irakun
(03.05.07 RV)Në Sharm el-Sheik të Egjiptit filloi sot Konferenca ndërkombëtare
për Irakun. Diskutimet e sotme janë përqëndruar në çështje ekonomike që kanë të bëjnë
me grupin e donatorëve e me planin 5-vjeçar Interneshënëll Kompakt uith Irak (International
Compact with Iraq) që koordinon iniciativat për rindërtimin e zhvillimin e vendit.
Si hap i parë, disa nga vendet kanë vendosur ta konsiderojnë të shlyer borxhin që
u ka Iraku. Sekretarja amerikane e shtetit, Kondolica Rajs u bëri thirrje shteteve
që të marrin pjesë në rindërtimin e Irakut, me një impenjim më të madh e më të shumtë
në numër. Nesër, konferenca merr karakter më tepër politik. Në plan të parë roli
i vendeve fqinjë me Irakun (Irani, Jordania, Kuvajti, Arabia Saudite, Siria dhe Turqia)
në procesin e stabilizimit të vendit. Po në këtë ditë, do të takohen edhe Kuarteti
për Lindjen e Mesme me përfaqësuesit e vendeve arabe të përfshira në procesin e paqes:
Egjipti, Jordania e për herë të parë, Siria dhe Arabia Saudite. Mund të ndodhë që
gjatë kësaj Konference të takohen sekretarja amerikane e shtetit dhe ministri i jashtëm
iranian, të cilët sot janë ulur afër në tryezën e drekës. Por sipas iranianëve, “tryeza
ishte e vogël”.
Ndërkaq, në Irak vazhdon dhuna. Katër filipinas
mbetën të vrarë në një sulm në të ashtuquajturën “zonë e gjelbërt”, zona e blinduar
e Bagdadit, ku e kanë selinë institucionet iraniane dhe ambasadat e huaja. Zëdhënësi
i Ministrisë së Brendshme iraniane deklaroi se është vrarë një nga terroristët më
të kërkuar, Abu Omar al Bagdadi, kreu i të ashtuquajturit “shtet islamik të Irakut”.
Televisioni tregoi edhe fotografinë e tij, por sipas televizionit arab Al Zhazira,
nuk është vrarë Al Bagdadi, por Ministri i Informacionit i shtetit të tij islamik.