1 maji Festa e Shën Jozefit Punëtor: Papa nënvizon përparësinë e njeriut mbi punën
(01.05.07 RV)Papa Benedikti XVI
që në fjalimin e tij të parë, më 19 prill të vitit 2005, ditën e zgjedhjes në fronin
e Shën Pjetrit, e shqipton dy herë fjalën “punë”. Atëherë thoshte për veten se ishte
një “punëtor” i përvuajtur në vreshtën e Zotit, duke nënvizuar se ndjehej i ngushëlluar
nga fakti se Zoti “di të punojë” e të veprojë edhe me mjete të pamjaftueshme. Më pas,
në fjalën e tij për Sindikatat katolike italiane ACLI, më 27 janar 2006, Papa theksonte
se “puna hyn në planin e Zotit për njeriun… është pjesëmarrja në veprën e Tij krijuese
e shëlbuese”. Për këtë arësye “personi është metri i dinjitetit të punës”: Nga
përparësia e vlerës etike të punës njerëzore, dalin përparësi të tjera: ajo e njeriut
mbi vetë punën, ajo e punës mbi kapitalin, ajo e destinacionit universal të të mirave
materiale mbi të drejtën e pronës private: pra, përparësia e të qënit mbi të pasurit.
Pak ditë pas zgjedhjes, më 1 maj 2005, Papa Benedikti XVI dilte për herë
të parë në dritaren e studios së tij private për Lutjen e Mbretëreshës Qiellore, kushtuar
botës së punës, gjatë së cilës uroi që puna “të mos u mungojë sidomos të rinjve”.
Më 19 mars 2006, në Solemnitetin e shën Jozefit, Ati i Shenjtë kremtoi meshën për
punëtorët, duke i ftuar besimtarët “të shenjtërohen nëpërmjet punës”, sepse “megjithëse
i nevojshëm, nuk mjafton vetëm kualifikimi teknik e profesional”, për t’iu përgjigjur
plotësisht thirrjes së Zotit: Puna ka rëndësi të dorës së parë për realizimin
e njeriut dhe për zhvillimin e shoqërisë, e për këtë duhet që ajo të jetë organizuar
dhe të zhvillohet gjithnjë në respektim të plotë të dinjitetit njerëzor e në shërbim
të së mirës së përbashkët. Njëkohësisht, është e domosdoshme që njeriu të mos bëhet
skllav i punës, të mos e ketë atë si idhull, duke pretenduar të gjejë në të kuptimin
e fundit e përfundimtar të jetës. Papa kujton rëndësinë e pushimit të së dielës.
Duhet kërkuar që e diela të mos jetë njëlloj me ditët e tjera të javës – nënvizon
– është një zgjedhje e qytetëruar”. Gjatë këtyre dy vjetëve të papnisë, Benedikti
XVI ka bërë thirrje të ndryshme kundër shfrytëzimit të punëtorëve, në favor të sigurisë
në punë, për futjen e personave me të meta fizike në aktivitete pune, ka denoncuar
trajtimin e emigrantëve si mall e thjesht si krahë pune, është shprehur kundër punës
së paguar keq, e cila shpesh pengon planet e njerëzve për të ardhmen, siç janë martesa
e krijimi i familjes. Të rinjve u ka thënë se nuk ka rëndësi vetëm të bëhen më produktivë
e më konkurrentë, por para së gjithash duhet të jenë dëshmitarë të bamirësisë e dashurisë.
Pikërisht të rinjtë, të cilët i fton të mos e humbin shpresën, Ati i Shenjtë ua beson
Shën Jozefit: Dua t’ia besoj atij të gjithë të rinjtë që me mund arrijnë të
hyjnë në botën e punës, të papunët dhe ata që vuajnë nga kriza e punës. Sëbashku me
Shën Marinë, Nusen e tij, Shën Jozefi i mbrojttë të gjithë punëtorët dhe arriftë të
nxjerrë prej Zotit qetësinë e paqen për të gjitha familjet e për gjithë njerëzimin.
Duke parë këtë shenjt të madh, të krishterët mësofshin të dëshmojnë në çdo fushë të
punës dashurinë e Krishtit, burim i solidaritetit të vërtetë dhe i paqes së qëndrueshme.