Papa Benedikti XVI shuguron 22 meshtarë dhe lutet për thirrje të reja cilësore
(29.04.07 RV)Në Ditën Botërore
të lutjes për thirrjet meshtarake e rregulltare, Papa Benedikti XVI shuguroi 22 meshtarë
të dioqezës së Romës dhe u tha: në shërbimin tuaj meshtarak duhet të keni forcën e
besimit dhe guximin e gëzimit. 22 të rinj në gjunjë, me kokën ndër duart e
Papës, palmat me vajin krizmal, gati për t’u bërë meshtarë. Një pamje që sfidon kohën
tonë, në të cilën flitet për rritje të popullsisë, por për mungesë thirrjesh. Në orën
9 të mëngjesit, në Bazilikën e Shën Pjetrit në Vatikan, qenë me mijëra ata, që morën
pjesë në Meshën e Shenjtë të kremtuar nga Papa Benedikti XVI sëbashku me kardinalin
vikar të dioqezës së Romës, Kamilo Ruini dhe me ipeshkvijtë e dioqezave nga vinin
të rinjtë. Këta të rinj u bënë meshtarë në një ditë në të cilën liturgjia flet për
figurën e Bariut të Mirë, një copë Ungjilli me “densitet të madh teologjik” siç tha
Ati i Shenjtë në homelinë e tij: Jezusi flet për vete si për Bariun e Mirë
që u jep jetën e amshuar deleve të tij… Ai i njeh delet dhe delet e njohin atë, ashtu
si edhe Ati e njeh Atë e Ai e njeh Atin Qiellor. Nuk kemi të bëjmë thjesht me një
njohje intelektuale, por me një marrëdhënie personale të thellë; një njohje zemrash,
karakteristike e atij që do dhe duhet; e atij që është besnik dhe e di se mund t’i
besojë pastaj dikujt; një njohje dashurie në sajë të së cilës Bariu i fton të vetët
ta ndjekin, dhe që shfaqet plotësisht në dhuratën e jetës së amshuar që u bën atyre. Ky
intimitet i thellë shpirtëror me Krishtin, mundësia për të kuptuar ndjenjat e tij,
duhen ushqyer – theksoi Papa – me shkollën e përditshme të shenjtërimit, që është
elteri, Eukaristia. Prej andej, vjen shërbimi i Fjalës, i pajtimit. Ati i Shenjtë
nguli këmbë me forcë në aspektin e “gëzimit” që duhet të shoqërojë mënyrën me të cilën
meshtarët e rinj do t’i shërbejnë Zotit. Qoftë për ju – u tha Papa atyre – motiv ngushëllimi
i përhershëm, siguria se Krishti nuk na braktis e se asnjë vështirësi nuk mund të
pengojë realizimin e planit të tij universal të shpëtimit. Pikërisht sot, Kisha Katolike
në mbarë botën kremtonte Ditën Botërore kushtuar Thirrjeve për rregulltarë e meshtarë
e Papa pati për këtë një meditim të veçantë: Të lutemi, që ata të cilët janë
zgjedhur për këtë mision kaq të lartë të shoqërohen nga bashkësia në lutje e të gjithë
besimtarëve. Të lutemi që në çdo famulli e bashkësi të krishterë, të rritet kujdesi
për thirrjet e për formimin e meshtarëve: ai fillon në familje, vazhdon në seminar
dhe përfshin të gjithë ata që e kanë për zemër shpëtimin e shpirtërave…T’i rrethojmë
këta vëllezërit tanë në Krishtin, me solidaritetin tonë shpirtëror. Të lutemi që të
jenë besnikë ndaj misionit për të cilin i thërret Zoti, e të jenë të gatshëm ta përsërisin
çdo ditë para Zotit “po”-në e tyre, të tyren “ja ku jam”, pa rezerva. “E t’i
kërkojmë Zotit të vreshtit, në këtë Ditë kushtuar Thirrjeve – përfundoi Benedikti
XVI – që të vazhdojë të thërrasë meshtarë të shumtë e të shenjtë, që i kushtohen krejtësisht
shërbimit të popullit të krishterë”. Në momentin e Lutjes së Mbretëreshës Qiellore,
para 50 mijë shtegtarëve të mbledhur në sheshin e Shën Pjetrit, Papa Benedikti XVI
përmendi sërish 22 meshtarët e rinj. Sërish një urim për meshtarë me cilësi, pavarësisht
nga numri. Ati i Shenjtë i ftoi ata t’i mbeten besnikë lutjes dhe ta kremtojnë Meshën
e Shenjtë me një përkushtim gjithnjë të rinovuar. Duke pasur parasysh temën e Ditës
së sotme Botërore kushtuar Thirrjeve: “vokacioni në shërbim të Kishës së bashkuar
në Zotin”, Papa Benedikti XVI tha: Të gjithë të pagëzuarit janë të thirrur
të kontribuojnë në veprën e shpëtimit. Por në Kishë ekzistojnë disa thirrje që i kushtohen
veçanërisht shërbimit të bashkimit në Zotin. Përgjegjësi i parë i bashkimit katolik
në Zotin është Papa, Pasardhës i Shën Pjetrit e Ipeshkëv i Romës; me të, rojtarë dhe
mësues të unitetit janë Ipeshkvijtë, pasardhësit e Apostujve, të ndihmuar nga meshtarët.
Por në shërbim të bashkimit në Zotin janë edhe personat e shuguruar e të gjithë besimtarët.
Në qendër të Kishës së bashkuar në Zotin është Eukaristia: thirrjet e ndryshme marrin
nga ky Sakrament i Lartë, forcën shpirtërore për të ndërtuar vazhdimisht në dashuri,
Korpin e vetëm të Kishës. Një kuriozitet. Ndër meshtarët e shuguruar sot që
edhe djali i fotoreporterit që ka shoqëruar gjithnjë papët. Arturo Mari, 27 vjet pas
Papës Gjon Pali II e tani pas Benediktit XVI, si fotoreporter i gazetës vatikanase
“Osservatore Romano” ndodhej për herë të parë në një meshë papnore, nga ana e publikut,
pa makinën fotografike në duar. Qe edhe i pari që mori Kungimin nga duart e Atit të
Shenjtë, i cili shuguroi meshtar djalin e tij Huan Karlos Mari. Janë 406 mijë meshtarët
në të gjithë botën. Për formimin e tyre Kisha thekson se është e rëndësishme përgatitja
e mirë në shkolla, një përgatitje që i gjen bazat në thirrjen e dashurisë që Zoti
u bën atyre për t’i shërbyer Atij e popullit të krishterë.