Inkurajimi i Papës për vijimin e rrugës së dialogut ekumenik në audiencën me anëtarët
e KKEE.
(26.04.2007 RV)Benedikti XVI priti
sot në Vatikan anëtarët e Kryesisë së Këshillit të Konferencave Ipeshkvnore Evropiane,
të kryesuar nga kardinali Peter Erdë. Prelatët, pasi kishin vizituar më parë disa
dikastere të Vatikanit, u takuan me Papën për të reflektuar mbi problemet e Evropës
dhe mbi projektet e KKEE-e. Me këtë rast, në Sallën Markoni të Radios sonë, u mbajt
një konferencë shtypi, gjatë së cilës u fol për nismat e ardhshme evropiane organizuar
nga Kryesia e Këshillit të Konferencave Ipeshkvnore Evropiane, për të cilat flet
sekretari i përgjithshëm i Kryesisë, imzot Aldo Giordano, në mikrofonin e Radios
sonë: “Sigurisht Papa inkurajoi përpjekjet për pajtimin ndërmjet të krishterëve
e prej këndej, vijimin e rrugës ekumenike. Folëm për projektin e Asamblesë Ekumenike
të Sibiu-së, që do të mbahet në shtatorin e ardhshëm. E folëm edhe për marrëdhëniet
ndërmjet lindjes e perëndimit të Evropës, dmth për marrëdhëniet ndërmjet Kishave të
Perëndimit e të Lindjes me Kishën ortodokse. Folëm për Bashkimin Evropian e për rrugën
që duhet të ndjekin Kishat për të dhënë kontributin e tyre në këtë Bashkim Evropian,
duke punuar në gjirin e tij e, sidomos, duke mbështetur ato vlera, që kanë rëndësi
të dorës së parë për të”. Gjatë konferencës së shtypit, në të cilën mori pjesë
edhe zevendës-kryetari i KKEE-e, kardinali Josip Bozaniç, kardinali Peter Erdë
paraqitit takimin evropian të profesorëve universitarë, që do të mblidhet në Romë
nga 21 deri më 24 qershorin e ardhshëm. Kryetari i KKEE-e nënvizoi rëndësinë e humanizmit
të ri për Evropën: “Do të flasim për humanizmin e ri në Evropë, për vlerat themelore
njerëzore që duhen paraqitur, duhen mbrojtur e duhen fuqizuar edhe në jetën publike
të Kontinentit. Ky takim, tepër i rëndësishëm, do të përfshijë edhe disa konferenca
shkencore, si dhe takime të nivelit shoqëror. Në përfundim, shpresojmë të kemi edhe
një takim me Shenjtërinë e Tij, që e inkurajon shumë këtë veprimtari të përbashkët.
Sigurisht vlerat themelore nuk mbrohen në nivel politik, por në nivel njerëzor, që
është edhe më i thellë. Me njerëzit e shkencës e të kulturës po zhvillojmë një dialog
të thelluar e, nga viti në vit, shikojmë shenja të dëshirës për bashkëpunim, gjë që
e presim me një kënaqësi të veçantë.