Benedikti XVI :Familja, element i rëndësishëm shoqëror
(21. 04.2007 RV)Sot paradite, rreth
orës 15. 30, Benedikti XVI u nis me avion nga aeroporti romak i Çampinos drejt Vigjevanos
e pastaj Pavisë, duke filluar kështu vizitën e katërt baritore në Itali. Papa zbriti
në aeroportin Milano-Linate e që aty u nis me helikopter drejt Vigjevanos. Arriti
pak para orës 17. 00. në stadiumin “Dante Merlo” ku e prisnin mijëra të rinj si dhe
anëtarët e shoqërive sportive vendase. Këtu Papa u përshëndet nga autoritetet civile
e kishtare e më pas u nis drejt qendrës së qytetit. Vargani i makinave përshkoi ngadalë
rrugët kryesore, duke kaluar edhe para Kuvendit të klauzurës të Motrave Adhuruese
të të Shenjtnueshmit Sakrament, që e përshëndetën Atin e Shenjtë nga tremja e Kishës.
Pastaj ushtuan daullet, që lajmëruan se Benedikti XVI po i afrohej Kryeipeshkvisë.
Daullet u shoqëruan nga këmbanat e Katedrales, që mbushëm me tinguj festivë Sheshin
Dukal, ku Benedikti XVI arriti i pritur me duatrokitje të stuhishme. Pas pak minutash
u duk së bashku me kryebashkijakun e Vigjevanos, profesor Ambroz Kota Ramuzino, në
ballkonin kryesor mbi Sheshin e Shën Ambrozit prej nga i drejtoi një përshëndetje
të përzemërt turmës brohoritëse që ishte mbledhur për ta pritur. Kujtoi së pari
këmbanat, të cilat në mesditë kishin rënë të gjitha përnjëherësh, duke krijuar një
atmoserë jashtzakonisht festive. Përshëndeti pastaj me radhë autoritetet civile e
kishtare, por përshëndetjen më të përzemërt ua drejtoi të sëmurëve e të rinjve, duke
uruar që Krishti i ngjallur t’i përsërisë secilit ftesën për ta ndjekur. “Mos
ngurroni t’i besoni – u tha Ati i Shenjtë - takojeni, dëgjojeni e duajeni me
gjithë zemër: në miqësinë me Të do të gjeni gëzimin e vërtetë që i jep kuptim jetës”. Më
pas Benedikti XVI iu afrua me procesion elterit të bardhë, ngritur në Sheshin Dukal,
stolisur me lule të bardha e të verdha, ngjyrat e Vatikanit, i shoqëruar nga kori
vigan i Katedrales. Nisi kështu bashkëkremtimin e Meshës Shenjte, i rrethuar nga mijëra
besimtarë të dioqezës lombarde. Homelia e Papës u përqendrua plotësisht tek ftesa
që Krishti i ngjallur u bëri dishepujve të vet: “Hidhini rrjetat ... e do të gjeni!”.
Janë fjalë të shkëputura nga fragmenti ungjillor i liturgjisë së sotme, që flet për
peshkimin e mrekullueshëm, kur Krishti i ngjallur iu duk për herë të tretë dishepujve
në brigjet e detit të Tiberiades. Pas shkandullit të Kryqit, ata kishin rifilluar
të peshkonin si më parë. Qenë kthyer në jetën e mëparshme – theksoi Ati i Shenjtë
– e kjo tregon qartë se bashkësia ishte shpërndarë. Por, kur gjithçka dukej e humbur,
e kotë, Jezusi erdhi t’i takonte, ashtu si në rrugën e Emaus. I gjeti me rrjetat bosh. “Po
zardhte agimi kur Krishti u afrua – e ata nuk e njohën – tha Papa e në vijim
shpjegoi se agimi në Bibël është simbol i ndërhyrjeve të jashtzakonshme të Zotit.
Nata kishte kaluar e Zoti i ftoi dishepujt e lodhur e të këputur, pa fryt: “Hidhini
rrjetat nga e djathta e barkës, e do të gjeni!” Dishepujt i besuan e rezultati ishte
peshkimi i begatë, i mrekullueshëm”. E pikërisht në atë ças, kur peshkatarët
mezi i nxirrnin në breg rrjetat, që mend griseshin nga pesha e peshkut, Gjoni, i ndriçuar
nga dashuria, i tha Pjetrit: “Është Zoti”- Kjo besojmë na fton të gjithëve të shpallim
se Krishti është Zoti i jetës sonë – tha Papa - dhe në vijim iu drejtua besimtarëve
të panumërt të dioqezës me fjalët: “Të dashur vëllezër e motra, uroj që sonte
Kisha që është në Vigjevano të përsërisë me entuziazmin e Gjonit: Jezu Krishti është
Zoti! E uroj akoma që bashkësia juaj dioqezane ta dëgjojë Zotin, i cili me gojën time
ju përsëritë: “Hidhi rrjetat, Kishë e Vigjevanos, e do të gjesh!” Faqja ungjillore
që sapo dëgjuam - vijoi të shpjegonte Papa - në njërën anë na kujton se duhet të impenjohemi
në veprimtaritë baritore, sikur gjithë rezultati të varej nga përpjekjet tona, në
anën tjetër, na bën të kuptojmë se suksesi i vërtetë i misionit tonë është plotësisht
dhuratë hiri”. Pastaj Benedikti XVI falënderoi përzemërisht autoritetet kishtare
e civile e sidomos besimtarët e panumërt, mbledhur në tremen e katedrales, që ndiqnin
me vëmendje e entuziazëm të jashtzakonshëm kremtimin në Sheshin Dukal, një nga sheshet
më artistike të Italisë, ideuar nga ipeshkvi i Vigjevanos, Imzot Huan Karamuel, shkencëtar
me famë evropiane, lindur katërqind vjet më parë. Ky shesh në të cilin spikat fasada
me arkitekturë krej të veçantë e katedrales, pranë së cilës lartohet Kështjella e
lashtë me kullën e saj, simbolizon – siç e kujtoi edhe Ati i Shenjtë gjatë homelisë
– sintezën e mrekullueshme të një tradite në të cilën gërshetohen dy përmasat themelore
të këtij qyteti: përmasa civile e ajo kishtare. I ftoi kështu t’i ruajnë me kujdes
traditat e lashta të krishtera. Hidhni rrjetat! – përsëriti disa herë Papa, duke
shpjeguar se kjo do të thotë në radhë të parë të besosh në Krishtin e në fjalën e
tij. Jezusi kërkon ta ndjekim me fe të sinqertë e të patundur – tha Benedikti XVI
dhe në vijim i ftoi besimtarët t’ia venë veshin fjalës së Zotit e ta meditojnë ditë
për ditë e sidomos, në përkim me vendimet e sinodit dioqezan të 1999-tës e me porositë
e Bariut të sotëm, të forcojnë bashkimin e t’i hapin horizonte të reja ungjillëzimit: “T’ju
prijë përherë – i porositi Papa – kjo fjalë e Zotit: të gjithë do ta dinë se
jeni dishepujt e mi, në se e doni njëri-tjetrin. E stili i bashkimit kërkon kontributin
e të gjithëve” – tha më pas Ati i Shenjtë dhe i ftoi të gjitha bashkësitë, grupet
e institucionet kishtare, bamirëse, shoqërore e kulturore të punojnë përherë në harmoni
me veprimtarinë baritore dioqezane, duke u kujdesur posaçërisht për të rinjtë. Gjatë
homelisë Papa Racinger kujtoi edhe pajtorët qiellorë të dioqezës së Vigjevanos: Shën
Ambrozin, Shën Karl Borromeun e të Lumin Mateo Karreri si dhe bij të tjerë të shquar
të këtyre trojeve, duke i propozuar si modele që të ftojnë të ecësh në shtigjet e
rrëpirta të shenjtërisë Në përfundim Benedikti XVI i porositi besimtarët të luten
bashkë me të, që bashkësia dioqezane t’i përgjigjet ftesës së Krishtit për t’i hedhur
rrjetat, me bindjen se peshkimi i mrekullueshëm nuk do t’u mungojë kurrë atyre që
besojnë në pushtetin e në praninë e Zotit i cili, në rrjedhë shekujsh, i dhuron vazhdimisht
popullit të vet rininë e Shpirtit Shenjt. E në sa ne po transmetojmë
Mesha ka përfunduar e Papa ka arritur me helikopter në Stadiumin “Pietro Fortunati”
të Pavisë, ku u prit nga autoritetet civile e kishtare. Pas pak makina e Atit të Shenjtë
do drejtohet nga Sheshi i Katedrales, ku do ta presin të rinjtë e dioqezës, kryebashkijakja
Piera Kapiteli dhe përfaqësuesi i qeverisë italiane Klemente Mastela, ministër i drejtësisë
e nga ku Papa do t’i drejtojë Pavisë përshëndetjen e tij të parë. Por në sa Ati i
Shenjtë përgatitet të flasë, po e përfundojmë kronikën tonë duke ju ftuar ta ndiqni
nesër, bashkë me ne, vazhdimin e kësaj vizite baritore në Pavi, ku paradite Papa do
të vizitojë poliklinikën e ‘Shën Mateut’ e do të bashkëkremtojë Meshën Shenjte dhe
lutjen e Mbretëreshës Qiellore në Kopshtijet Borromaike. Ndërsa pasdite, duke
nisur nga ora 16. 15, do të takohet me botën e kulturës, në oborrin Terezian të universitetit
të Pavisë. Më pas, rreth orës 17. 30, do të kremtojë Lutjet mbrëmësore me meshtarët,
rregulltarët, rregulltaret e seminaristët e dioqezës në bazilikën e Shën Pjetrit. Këtu
do të përfundojë vizita e Atit të Shenjtë, i cili do të niset me helikopter nga Pavia
për në aeroportin Milano-Linate e që aty, në Aeroportin romak të Çampinos e në Vatikan,
ku parashikohet të arrijë rreth orës 20. 15.