Sot Kisha festoi dyvjetorin e Papnisë së Benediktit XVI.
(19.04.2007 RV)Ishte ora 17. 50
e datës 19 prill, dy vjet më parë: nga oxhaku i Kapelës Sikstine nisi të dalë një
tym me ngjyrë të papërcaktueshme. Pastaj, papritmas, tymi u bë krejt i bardhë. Ishte
zgjedhur Papa! Nisi kështu papnia e Benediktit XVI, që u thirr për të zënë vendin
e Gjon Palit II, i cili i priu Kishës për afro 27 vjet. Papa Racinger, i 265-ti Vikar
i Krishtit, Papa i tetë gjerman në histori, në dy vjet shërbimi papnor ka takuar 7
milionë e gjysëm njerëz, ka bërë tre shtegtime italiane e pesë ndërkombëtare: ndërmjet
tyre, kujtojmë vizitën në Aushvic e në Xhaminë Blu të Turqisë. Ka shkruar Enciklikën
”Deus caritas est”; Nxitjen Apostolike mbi Eukaristinë dhe librin “Jezusi i Nazaretit”,
i cili sapo ka dalë në librari. Ta ndjekim hap pas hapi Papën në këto dy vjet Papnie: Habemus
papam …. – është njoftimi që dha dy vjet më parë kardinali protodikaon, Horhe
Arturo Medina Estevez. Teologu i ri Jozef Racinger dëshironte t’i shërbente Zotit
duke u bërë mësues… lutja e të përvujtit përshkon retë.. u bë katekist i botës: “Të
dashur vëllezër e motra, pas Papës së madh, Gjon Palit II, zotërinjtë kardinaj
më zgjodhën mua, punëtorin e përvujtë e të thjeshtë të vreshtës së Zotit”. (Fjalët
e para të Benediktit XVI) Thjeshtësia është një nga tiparet kryesore të Benediktit
XVI: fjala e tij është e qartë, e qetë, e thellë, prek zemrat e tund ndërgjegjet.
E butë dhe e fortë njëkohësisht. Flet për ligështinë e tij. E na kërkon të lutemi
për të, që të mësojë t’i dojë të gjithë, që të mos ikë nga frika, përballë ujqërve.
E na kujton se është Zoti ai, që e mbart Kishën e se edhe ne duhet ta mbartim njëri-tjetrin,
të gjithë, duke përfshirë edhe papën. Ky është misteri i Kishës shtegtare në histori
- drejt Zotit të vet - Kishës, e cila sot falënderon Zotin Jezus, pse i dha një Bari
të përvujtë e buzëqeshur, që e nisi shërbimin e tij duke e drejtuar me dashuri në
shtigjet e shpresës: “Dashuria për armikun është bërthama e ‘revolucionit të
krishterë’, revolucion që nuk bazohet mbi strategjitë e pushtetit ekonomik, politik
ose mediatik. Revolucioni i dashurisë, i një dashurie që nuk mbështetet plotësisht
mbi forcat njerëzore, por është dhuratë e Hyjit, fitohet vetëm duke ia besuar vetveten
pa asnjë kusht mirësisë së tij të mëshirshme. Ja e reja e Ungjillit, që e ndryshon
botën pa bërë zhurmë. Ja heroizimi i të vegjëlve, që besojnë në dashurinë e Zotit
dhe e përhapin atë edhe me çmimin e jetës së tyre, duke coptuar kështu zinxhirët e
padrejtësisë”. (Lutja e Engjëllit të Tënzot, 18. 02. 2007). Benedikti XVI thekson
me forë arsyetimin e fesë, duke ftuar edhe ata që nuk besojnë në dialogun e madh
të së vërtetës: Zoti i Jezusit është aq pambarimisht i mirë, aq i vogël e aq i madh,
sa t’i bindë të gjithë: “Në se vështrojmë rrugëzgjedhjet e mëdha, zgjedhja e
rrugës së krishterë është edhe sot më racionalja e më njerëzorja. Prandaj mund të
përpunojmë me besim një filozofi, një vizon të botës, që bazohet mbi këtë përparësi
të arsyes, mbi besimin se Arsyeja krijuese është dashuri e se kjo dashuri është Hyji”.
(Takimi me të rinjtë në Sheshin e Shën Pjetrit, 06. 04. 2006) Fjalimi i rëndësishëm
në Universitetin e Regensburgut, i keqinterpretuar nga mjetet e komunikimit, të cilat
vunë theksin mbi marrëdhëniet me Islamin, në të vërtetë i drejtohej sidomos botës
perëndimore: ishte ftesë për të zgjëruar horizontin e arsyes, të cilin kultura moderne
e ngushton vetëm në ato gjëra që mund të vërtetohen përmes eksperimentit, duke e bërë
këtë botë të paaftë për të dialoguar me kultura e fe të tjera. Papa i nxit të gjithë
të riprovojnë shijen e reflektimit dhe, duke iu drejtuar posaçërisht të rinjve, t’i
bëjnë vetes pyetjen e madhe mbi Zotin, të kërkojnë fytyrën e tij: “Të dashur
miq të rinj – sa rëndësi të madhe ka kjo, pikërisht sot: të mos ia lejojmë vetes të
luhatemi nga fryn era; të mos kënaqemi me atë që mendojnë, thonë e bëjnë të gjithë.
Të hetojmë rreth vetes në kërkim të Zotit. Të mos lejojmë që në shpirtin tonë të zhduket
dëshira për ta gjetur Zotin. Dëshira për Atë që është gjëja më e madhe. Dëshira për
ta njohur Atë – fytyrën e Tij…”. (Mesha në të ‘Dielën e Larit’, 01. 04. 2007) Kisha
– pohon Papa – nuk ka interesa e nuk kërkon privilegje: dëshiron vetëm të kumtojë
Krishtin e të mbrojë njeriun, të mbrojë më të vegjlit nga dhuna e më të mëdhenjve.
Prej këndej, Benedikti XVI numëron parimet që nuk mund të vihen në diskutim, duke
theksuar se mbrojtja e jetës, e familjes dhe e të drejtës së prindërve për të edukuar
fëmijët nuk janë parime konfesionale, por të shkruara në vetë natyrën njerëzore.
Mbi këto çështje – vëren Papa – ndërgjegja, nganjëherë e mposhtur nga mjetet e presionit
kolektiv, nuk tregon vigjilencën e duhur. E prej këndej shpjegon pasojat shkatrrimtare
të relativizmit, duke kritikuar absolutizmin dogmatik të atyre laicistëve të cilët
duan t’i heqin Kishës të drejtën që të shprehet lirisht. Paditë shkandullin e varfërisë
e të urisë, padrejtësitë e krijuara nga një farë globalizimi; neokolonializmin e vendeve
të pasura, trafikun e armëve që vijon, në një atmosferë indiference pothuajse të
përgjithshme. Ka posaçërisht për zemër Afrikën, Tokën Shenjte e i kushton vëmendje
të posaçme Kinës, në sa nënvizon sa i rrezikshëm është për Evropën mohimi i rrënjëve
të krishtera, gjë që do të thotë mohim i vetvetes. Shikon të keqen në botë e cila,
pavarësisht nga progresi i bërë – nuk është mundur aspak; madje duket se pushteti
i saj bëhet edhe më i fuqishëm, me gjithë përpjekjen e kotë për ta fshehur pas maskash.
Na mëson se vuajtja është një mister, të cilin Zoti e shpjegoi me Kryqin e të
Birit: “Krishti, duke vuajtur për të gjithë ne, i dha një kuptim të ri vuajtjes;
e vuri në një përmasë të re, në një rend të ri: në atë të dashurisë... Është pikërisht
vuajtja ajo që e djeg e e bën hi e pluhur të keqen me flakën e dashurisë - e nxjerr
edhe nga mëkati, një lulëzim shumformësh të së mirës... Çdo vuajtje njerëzore,
çdo dhimbje, çdo sëmundje, ka në vetvete premtimin e shëlbimit” (Takimi me Kurien
Romake, 22. 12. 2005). Papa punon papushuar për ekumenizmin dhe dialogun me
fetë e tjera, posaçërisht, me Islamin: është nevojë jetike, thotë. Mendimi i tij është
udhëheqës e konsekuent: i nxit katolikët të mos lëkunden, të mos e veçojnë Krishtin
nga Kisha, të mos e pranojnë falsitetin e kompromiseve, as atë që sot quhet ‘e keqja
më e vogël’. I fton të rizbulojnë heshtjen, meditimin e Biblës, lutjen, adhurimin
eukaristik, duke u larguar nga çdo lloj aktivizmi të zbrazët: “Lutja nuk është
një element ndihmës, nuk është optional, por është çështje jete a vdekjeje. Vetëm
ai që lutet, dmth që e lëshon plotësisht vetveten në dorë të Zotit me dashuri bijnore,
mund të hyjë në jetën e amshuar, që është vetë Zoti”. (Lutja e Engjëllit të Tënzot
e 04. 03. 2007). Feja nuk është barrë që të shtyp: madje të varesh nga Zoti,
do të thotë të jesh vërtetë i lirë, ndërsa nënshtrimi ndaj vullnetin e tij ‘të jep
krahë për të fluturuar lart’ dhe e shkëput ‘unin’ tonë nga izolimi, për ta bërë ‘një
në Krishtin’: Zoti është dashuri e dashuria e tij është e fshehta e lumturisë
sonë. Por për të hyrë në këtë mister dashurie, nuk ka rrugë tjetër, përveç asaj të
Kryqit”. (Audienca e përgjithshme e 21. 02. 2007) Benedikti XVI transmeton
paqe, sepse e shuan etjen në burimin e paqes: në Zotin, Atin e Mirë, i cili nuk na
braktis kurrë, as në ditët më të errta të jetës: “Bota jonë është botë e frikës:
frikës nga mjerimi e nga varfëria, frikës nga sëmundjet, nga vuajtjet; frikës nga
vetmia, frikës nga vdekja. Mund edhe të rrëzohemi, por në fund të fundit biem në duart
e Hyjit. E duart e Hyjit janë duar të mira”.(Vizita në Famullinë e Shën Marisë
Ngushëlluese, 18. 12. 2005).