Benedikti XVI priti në audiencë sekretarin e përgjithshëm të OKB-së, Ban Ki-mun.
(18.04.2007.RV)Filloi sot paradite
vizita në Itali e Sekretarit të Përgjithshëm të Organizatës së Kombeve të Bashkuara,
jug-koreanit Ban Ki-mun. Në orën 18. 00, kryetari i Pallatit të Qelqit, i shoqëruar
nga bashkëshortja Juu Sun-Taek dhe nga një grup bashkëpunëtorësh, u prit në audiencë
nga Benedikti XVI në Sallën e Fronit. Bisedimi, i zhvilluar në bibliotekën e Pallatit
Apostolik, zgjati 20 minuta. Në komunikatën e Sallës së Shtypit të Selisë
së Shenjtë nënvizohet se audienca radhitet në serinë e takimeve të mëparshme të
papëve, e posaçërisht të Gjon Palit II, me Sekretarët e Përgjithshëm të OKB-së, ndërmjet
tjerash si shenjë e vlerësimit të Selisë së Shenjtë për rolin qëndror të Organizatës
në ruajtjen e paqes në botë. Zoti Ban Ki-mun deshi ta takonte Papën në kuadrin
e udhëtimeve të tij të para në Afrikë, Evropë e Lindje të Mesme, pak muaj pas fillimit
të detyrës (1 janar 2007) edhe për t’i drejtuar Atit të Shenjtë ftesën për të vizituar
Kombet e Bashkuara. Gjatë bisedimeve, Papa dhe zoti Ban Ki-mun prekën tema me
interes të përbashkët, si besimi në shumanshmërinë dhe forcimin e dialogut ndërmjet
kulturave, pa harruar të theksojnë situatat ndërkombëtare që meritojnë vëmendje të
veçantë. U kujtua gjithashtu edhe kontributi i Kishës Katolike dhe i Selisë së
Shenjtë për zgjidhjen e konflikteve në vijim dhe për arritjen e marrëveshjeve ndërmjet
kombeve. Më pas shkëmbimi i dhuratave: Ban Ki- Mun i dhuroi Papës një vazo kristali
me simbolin e Kombeve të Bashkuara, Benedikti XVI – medalje ari të papnisë. Si
përfundoi audienca me Papën, Sekretari i Përgjithshëm i Kombeve të Bashkuara u takua
edhe me Sekretarin e Shtetit të Vatikanit, kardinalin Tarçizio Bertone dhe me Sekretarin
për marrëdhëniet me shtetet, kryeipeshkvin Dominik Mamberti. Para audiencës
me Papën, Ban Ki-Mun u takua së pari me presidentin e Republikës italiane, Gjorgjo
Napolitano e, më pas, me minstrin e jashtëm, Massimo D’Alema. U prekën një mori temash,
që nga situata në Irak e në Afganistan, tek nyja e pengjeve e problemi bërthamor iranian.
Por duhet nënvizuar se në qendër të vëmendjes ishte reforma në OKB dhe beteja e nisur
në Itali për një moratorium kundër dënimeve me vdekje, e cila mbështetet plotësisht
nga numri 1 i Pallatit të Qelqit, sepse në përkim të plotë me mendimin e tij. Nesër,
sipas programit, sekretari i përgjithshëm i Kombeve të Bashkuara do të vizitojë një
bazë të prapavijës të OKB-së në Brindizi.