Benedikti XVI kremton 80-vjetorin e ditëlindjes i rrethuar nga dashuria e miqve: pret
në audiencë kardinalin Veter dhe autoritetet e Bavarisë.
(16.04.2007 RV)Një ditë me shijen e festës në familje, në Bavarinë e tij. Nisi
kështu për Benediktin XVI dita e 80-vjetorit të lindjes së tij, e cila publikisht
u kremtua dje me Meshën në Sheshin e Shën Pjetrit. Ndërsa paraditja e sotme iu kushtua
audiencave me autoritetet kryesore bavareze, ardhur në Vatikan për t’i bërë personalisht
urimet bashkatdhetarit të shquar. I pari që u prit sot në audiencë private ishte
presidenti i Bavarisë, Edmund Shtoiber, pas të cilit, ministri-president i Landit
Shlezvig-Holshtain, Peter Harri Karstensen, që të dy të shoqëruar nga grupet përkatëse.
Pas mesdite urimi u bë kolektiv në Sallën Klementine, kur Benedikti XVI u takua, në
një atmosferë të ngrohtë e miqësore, me kardinalin Fridrih Veter, administrator apostolik
i Mynih-Fraisingen, së bashku me një delegacion prej 50 anëtarësh të kapitullit metropolitan.
Pastaj, në Sallën Dukale, Benedikti XVI u ul në sofrën e festës i rrethuar nga anëtarët
e Kolegjit Kardinalor. Kremtimet patën edhe një shtesë të këndshme sot pasdite,
në orën 18, në Sallën e Palit VI ku, si dhuratë e zgjedhur për Papën muzikant, artistët
e Sydvestrundfunk (SWR) dhanë një koncert, në fillim të të cilit Benediktin XVI e
përshëndeti kryeministri i Baden-Vyrtembergut, Gynter Oetinger dhe drejtori i përgjithshëm
i orkestrës bavareze, profesor Peter Vos. Në koncert u luajtën arie nga krijimtaria
e Giovani Gabriel, Vofgang Amadeus Mozart e Antonin Dvorak. Në përfundim të koncertit
Papa përshëndeti të pranishmit, posaçërisht kryeminstrin e Baden-Vyrtembergut, Gynter
Oetinger dhe drejtorin e përgjithshëm të orkestrës bavarese, profesor Peter Vos, duke
i falënderuar për urimet që i bënë në fillim të koncertit, të cilin e quajti dhuratë
të mrekullueshme që i erdhi për ditëlindje nga Baden-Vyrtembergu, i cili – siç u shpreh
Papa - lidhet me etapa të rëndësishme të jetës së tij, me rrënjët e tij, që natyrisht
nisin në Atdhe. Ati i Shenjtë kujtoi periudhën e punës në Tybingen, shkëmbimin intelektual
e shkencor në këtë universitet dhe shumë takime të çmuara me njerëz, të cilët do të
vijonte t’i takonte edhe më vonë. Pastaj i drejtoi përshëndetjen e tij të përzemërt
edhe artistëve, të cilët i falënderoi për atmosferën frymëzuese artistike që i krijuan
në këtë festë me gjuhën universale të muzikës. Ky universalitet – vijoi Papa –
sot bëhet edhe më i theksuar në saje të mjeteve elektronike e digjitale të komunikimit,
që i krijojnë muzikës mundësinë të hyjë në çdo shtëpi e në çdo zemër. E duke menduar
për Mozartin, por edhe për kompozitorë të tjerë – Benedikti XVI theksoi se gjuha e
muzikës, gjuhë universale e bukurisë, është e aftë t’i bashkojë njerëzit vullnetmirë
të mbarë tokës e t’i nxisë t’i ngrejnë sytë drejt qiellit, drejt së Mirës e së Bukurës
absolute, që burojnë nga vetë Hyji. Në përfundim Papa Racinger e falënderoi Zotin
që, qysh në fëmijëri, i vuri pranë muzikën, gati si një shoqe udhe, e më pas falënderoi
edhe të gjithë ata që bashkojnë muzikë e lutje për lavdërimin plot harmoni të Hyjit
e të veprave të tij.E pas urimit që madhështia e bukuria e muzikës t’u japin të gjithëve
frymëzim për të ndërtuar një botë në të cilën mbretëron dashuria, solidariteti e paqja,
Ati i Shenjtë u dha të pranishmëve bekimin e tij apostolik.