Сёньня Вялікі ( ці як у нас гаворыцца Страсны) Чацьвер. Раніцай ў Катэдральных Каталіцкіх
Храмах адбываецца асаблівая Сьвятая Імша на ўспамін устанаўленьня сакраманту сьвятарства.
Літургія носіць вельмі ўрачысты характар. Згодна са звычаям католікаў у часе Сьвятой
Імшы сьвятар блаславіць алей хворых, алей катэхэмэнаў і асьвячае алей-хрызмы. Увесь
год гэтыя сьвятыя алеі будуць выкарыстоўвацца ва ўсіх касьцёлах пры ўдзяленьні сакрамантаў
хросту, сьвятарскіх пасьвячэньняў, для намашчэньня хворых. На знак лучнасьці паміж
Пастырам Унівэрсальнае Царквы і ягонымі сабратамі, якія вядуць душпастырскую працу
ў розных дыяцэзыях сьвету, сёньня раніцай, 5-га красавіка, ў галоўнай Базыліцы Сьвятога
Пятра ў Рыме, прайшла спэцыяльная Сьвятая Імша “Крыжмы”- на знак адзінства Рымскага
Папы са сваімі сьвятарамі. Папа Бэнэдыкт 16 саслужыў яе разам з кардыналамі, біскупамі
і сьвятарамі прысутнымі ў гэты час у Рыме. У гэтым годзе, як і ў мінулым, Папа
Ратцынгэр не зьвярнуўся да сьвятароў з пасланьнем на Вялікі Чацьвер. Гэтым Бэнэдыкт
16 спыніў традыцыю свайго папярэдніка Папы Яна Паўла ІІ. У 1979-м годзе Папа Вайтыла
пачаў пісаць пасланьні на Вялікі Чацьвер у знак свайго асаблівага клопату аб сьвятрастве
і аб праблемах сьвятарскага слу-жэньня. У гады памёршага Папы Яна Паўла ІІ пасланьні
тычыліся такіх тэмаў, як сьвятарскія пакліканьні, маральны стан духоўных асобаў,
духоўнасьць і цэлібат. У сваім казаньні, пад-час адпраўленьня Эўхарыстыі, якая
прыпомнім адбылася ў Базыліцы Сьвятога Пятра, Папа Бэнэдыкт 16 ў прыватнасьці сказаў: Рускі пісьменнік Леў
Талстой расказвае пра аднаго строгага караля, які просіць ў сваіх сьвятароў ды вучоных
паказаць яму Бога. Вучоныя не былі ў стане зрабіць гэтага. Тады адзін пастух, які
вяртаўся з поля, сказаў сьвятарам і вучоным, што ён зробіць гэта. Пайшоў да караля
ды сказаў яму: “каб адказаць на тваё пытаньне мы мусім замяніцца вопраткамі”. Кароль
згадзіўся на гэта: перадаў сваю каралеўскую вопратку пастуху ды затым апрануўся ў
бедную ягоную вопратку. Тады пастух гаворыць каралю: “гэта тое, што Бог робіць, тое,
што ты хацеў убачыць ”. Сапраўды- сказаў Папа Бэнэдыкт 16—Сын Божы ( Сапраўдны Бог)
скінуў з сябе сваю прыгожую боскую вопратку, стаўшыся слугою, падобным да звычайных
людзей. Зьявіўся ў чалавечай постаці, паніжыўшы сябе.. аж да крыжовай сьмерці. Як
піша Апостал Павал у Пасланьні да Галятаў: Хрыстос апрануўся ў нашую вопратку: значыць
у нашыя болі і радасьці быць чалавекам, меў голад, смагу, быў змучаны ды меў расчараваньні,
страх сьмерці. Ісус – сказаў Папа- перадаў нам гэтую сваю “вопратку”. Мы як сьвятары-
працягваў Бэнэдыкт 16- мусім апрануцца ў Хрыста, ахвяравацца Яму так як Ён аддаў Сябе
дзеля нас. Ды на заканчэньне сваёй прамовы Папа падкрэсьліў абавязкі і заданьні
сьвятароў.
У гэты момант, калі ідзе ў эфір нашая праграма, Папа Бэнэдыкт
16 адпраўляе Імшу Гасподняе Вячэры ў Базыліцы Сьвятога Яна на Латэране. Сьвяцейшы
Айцец абмыў ужо ногі 12-м канонікам гэтае Базылікі. Гэтым актам кожны сьвятар уключаецца
ў пасланніцтва, якога запатрабаваў Хрыстос- менавіта быць слугою для сваіх братоў:
бо Сын Чалавечы прыйшоў не каб Яму служылі, але каб паслужыць і аддаць сваю душу на
выкупленьне многіх. Але аб гэтых і іншых падзеях Вялікага Тыдня мы будзем больш
гаварыць у нашай заўтрашняй праграме.