Shorti përcakton fituesit e zgjedhjeve në Shqipëri?
(29.03.07 RV)Ndodh në Shqipëri. Ndodh që pas 40 ditë mosmarrëveshjesh se kush
fitoi zgjedhjet lokale në njësinë numër 10 të Tiranës, Komisioni Qendror i Zgjedhjeve
të mblidhet për të parë se si mund të dalë nga situata, dhe pas shumë diskutimesh
të vendosë… të vendosë që prej dy kandidatëve, Mira Veizi e Partisë Socialiste dhe
Gerti Bogdani i Partisë Demokratike, të fitojë ai që do të ketë fatin të kapë topin
plastik ku është shkruar “Fitues”. Lajmi konsiderohet i denjë për agjensitë e huaja,
të cilat me një seri pikëpyetjesh çuditen se si fati i votave të zgjedhësve në një
sistem demokratik vendoset me short. Çudi, por s’është për t’u çuditur! Ndodh në Shqipëri!!!
Mira Veizi nuk e ka pranuar rezultatin e shortit, që e ka nxjerrë fitimtare dhe do
t’i drejtohet gjyqit, por për agjensitë e huaja kjo është thjesht një sjellje që lind
nga fryma e dyshimit përcjellë në socialisten e ditëve tona nga koha e diktaturës
komuniste dhe jo nga ndonjë mendim fisnik për të mos pranuar atë që ndoshta s’i takon.