Mbi kremtimin e sotëm të Papës, reflektim i kryeipeshkvit, Angjelo Komastri.
(29.03.2007 RV)Imzot Komastri, kryeprift i Bazilikës së Shën Pjetrit e Vikar
i Papës për Vatikanin, flet për këtë nismë të Papës në mikrofonin e Radios sonë: Përgjigje :
- Është nismë që e pati marrë edhe Gjon Pali II dhe që i përgjigjet impenjimit
pedagogjik të Papës. Shenjtëria e Tij na mëson me çdo gjest ; me çdo gjest na edukon,
e sot ndjehet fuqimisht nevoja e riedukimit të të gjithëve për ta rizbuluar dhuratën
e madhe të Sakramentit të pendesës, të pajtimit me Zotin. Dëshiroj të nënvizoj se
Sakramenti i pajtimi është dhuratë Pashkësh, sepse pikërisht ditën e Pashkëve Jezusi
u tha Apostujve : «Shkoni në mbarë botën ; atyre që jua falni mëkatet, u falen » ;
sepse s’ka gjë më të bukur sesa të falësh e të falesh. Sikur ta kuptonim se falja
është ilaçi i vërtetë që shëron plagët e ankthet e shpirtit njerëzor, do të rendnim
drejt rrëfyestoreve e do të gjunjëzoheshim aty me gëzim të pakufishëm. Pyetje :
- Të rinjtë sot rrëfehen pak e aspak. Pse, imzot ? Përgjigje : - Sepse
nuk e kanë kuptuar Sakramentin e rrëfimit. E edhe pse nganjëherë ne, meshtarët, bëjmë
pak për t’i tërhequr në rrëfyestore, por unë jam i bindur se ne, meshtarët, e Kisha
vetë përmes meshtarëve, ka në dorë një margaritar të çmuar, një bombë dashurie : duhet
t’ia heqim kapsollën kësaj bombe, që nga Sakramenti i rrëfimit të shpëthejë shumë
shenjtëri, e prej këndej, shumë lumturi. Pyetje : - Dëshirojmë të dimë sa
herë duhet të rrëfehemi e pse ?Përgjigje : - Është e qartë se nevoja e rrëfimit
lidhet me mëkatin e rëndë që mund të jetë bërë. Sigurisht që pas një mëkati të rëndë,
rrëfimi është i domosdoshëm, nuk mund të hiqet dorë prej tij, sepse është sakramenti
që shëron, që të vë në paqe me Zotin. Por rrëfimi është i nevojshëm edhe kur nuk ke
rënë në mëkat të rëndë sepse përqafimi me Zotin lë gjithnjë shenja të dukshme. Kur
kërkojmë falje, rritet zelli e pasi gjunjëzohemi, sigurisht ngrihemi si të ringjallur,
me ndjesinë se Zoti na ka falur. Prandaj do të ishte e këshillueshme që i krishteri
të rrëfehej çdo pesëmbëdhjetë ditë ose, së paku, një herë në muaj.