Serbët dhe shqiptarët në garë dipllomatike për përkrahës mbi Kosovën.
(28.03.07 RV)Si shqiptarët, ashtu edhe serbët kanë filluar garën diplomatike
për të fituar sa më shumë përkrahës për qëndrimet e tyre ndaj Kosovës. Ministri i
jashtëm i Shqipërisë, Besnik Mustafaj është nisur sot për në Nju Jork ku do të takohet
me përfaqësuesit e vendeve anëtare të Këshillit të Sigurimit. Misioni i tij është
bindja e ambasadorëve se pavarësia e Kosovës është e domosdoshme. Ndërkaq, kryeministri
i Serbisë, Vojisllav Koshtunica ka deklaruar për mediat se “Refuzimi i planit të kryenegociatorit
Marti Ahtisari, që parashikon pavarësi të mbikqyrur për Kosovën, është prioritet kryesor
për Serbinë”. Nga ana e tij, presidenti i Kosovës, Fatmir Sejdiu konfirmoi sot se
i ka ftuar ambasadorët e vendeve anëtare të Këshillit të Sigurimit të OKB-së të vizitojnë
Kosovën, për t'u njohur me të. Ai sqaroi se në veçanti ka ftuar ato vende që ende
nuk janë deklaruar qartë për statusin e Kosovës.
Nëse Këshilli i Sigurimit
të OKB-së miraton planin e Ahtisarit, Rusia do të kërkojë hetime lidhur me zbatimin
e të gjitha rezolutave paraprake të OKB-së në Kosovë. Deklarata vjen nga ministri
i jashtëm rus, Sergei Lavrov. Ministria e Jashtme ruse ka nxjerrë një komunikatë për
mediat, ku thuhet se themelimi i një shteti kosovar do të ketë efekt negativ për stabilitetin
e Evropës. Ndërkaq sot, në një bisedë telefonike ndërmjet presidentit rus Putin
dhe atij amerikan Bush, Putin ka përsëritur qëndrimin e Moskës, sipas së cilës Rusia
është kundër çdo lloj zgjidhjeje që u imponohet Serbisë dhe Kosovës, dhe dëshiron
një status të pranueshëm për të dyja palët.