Lajmërimi i Zotit dhe vlera e martirizimit të krishterë: në qëndër të reflektimeve
të Engjëllit të Tënzot.
(26.03.2007 RV)Po e fillojmë programin
e sotëm me përshëndetjen e Benediktit XVI drejtuar fëmijëve dhe prindërve shqiptarë
nga Berati, të pranishëm në lutjen e Engjëllit të Tënzot me mësueset e përshpirtshme
Filipini, që kryejnë prej vitesh misionin e tyre në qytetin e përmendur shqiptar: ‘Me dashuri përshëndes edhe fëmijët e shkollës së mësueseve të përshpirtshme
Filipini në Berat, të pranishëm së bashku me prindërit e tyre”. Lajmërimi i
Zotit - Mister mahnitës dhe vlera e martirizimit të krishterë të dëshmitarëve të fesë,
që nuk e kërkojnë vdekjen por e jetojnë si aktin më të lartë të dashurisë për vëllezërit
- ishin në qëndër të vëmendjes së Papës në lutjen e djeshme të Engjëllit të Tënzot Kujtojmë
se e diela e ardhshme është e Diela e Larit e njëkohësisht, Dita XXII botërore e rinisë.
Benedikti XVI do takohet me të rinjtë e dioqezës së Romës për liturgjinë pendestare,
të cilën do ta kryesojë të enjten pasdite në Bazilikën e Shën Pjetrit. “Lajmërimi
i Zotit është edhe festë kristologjike” – shpjegoi Papa - sepse kremton misterin
kryesor të Krishtit: Mishërimin e tij. Mister mahnitës feje – shtoi Ati i Shenjtë
– ngjarje e përvujtë, e fshehur – askush nuk e sheh, askush nuk kujtohet, përveç
Marisë – e megjithatë është ngjarja më vendimtare për historinë e njerëzimit. Kështu
e kujtoi Benedikti XVI solemnitetin e sotëm të Lajmërimit të Zotit, që zakonisht bie
më 25 mars, por që sivjet, me që përkonte me të Dielën e pestë të Krezhmëve, u shty
për sot. Papa u ndalua në mënyrë të veçantë tek pohimi i Virgjërës Mari, që e
kundrojmë në Lutjen e Engjëllit të Tënzot: “Qe shërbëtorja e Tënzot, u bëftë
mbi mua si është Fjala jote !”. Përgjigja që Maria i jep Engjëllit vijon në Kishë,
e cila është e thirrur ta bëjë Krishtin të pranishëm në histori, duke ofruar gatishmërinë
e saj, që Zoti të vijojë ta vizitojë njerëzimin me mëshirën e vet ». Në të
vërtetë – shtoi Ati i Shenjtë – pohimi i Marisë është pasqyrim i përkryer i pohimit
të vetë Krishtit kur hyri në botë, siç shkruhet në Letrën drejtuar Hebrenjve, ku shpjegohet
Psalmi 39 : « Ja, unë po vij – sepse për mua është shkruar në rrotullën e librit –
për të bërë, o Zot, vullnetin tënd ! ». E Benedikti XVI nënvizoi se pohimi i Jezusit
e i Marisë përsëritet në pohimin e shenjtorëve, sidomos të martirëve, që mbyten për
kauzën e Ungjillit. Kujtoi, në vijim, se pikërisht të shtunën e kaluar, në përvjetorin
e vrasjes së imzot Oskar Romeros, kryeipeshkëv i San Salvadorit, u kremtua Dita e
lutjes dhe e agjërimit për misionarët martirë : ipeshkvinj, meshtarë, rregulltarë,
rregulltare e laikë, të mbytur në sa kryenin misionin e tyre në shërbim të ungjillëzimit
e të përparimit njerëzor. Misionarët martirë – pohoi Papa – janë « shpresë për botën »
- dhe më pas shpjegoi vlerën e krishterë të martirizimit: « Martirizimi i krishterë
përligjet vetëm si akti më i lartë i dashurisë për Zotin e për vëllezërit ». Martirët
– tha Papa – dëshmojnë se dashuria e Krishtit është më e fortë se dhuna e se urrejtja : « Ata
nuk e kërkuan martirizimin, por qenë gati të japin jetën për t’i qëndruar besnikë
Ungjillit ».Pas lutjes mariane – Papa kujtoi se të dielën e ardhshme do të kremtohet
Dita XXII botërore e rinisë, sivjet me temë «Ashtu si ju kam dashur unë, ashtu
duajeni edhe ju njëri-tjetrin! ». Për t’u përgatitur për këtë takim e për kremtimin
e Pashkëve, Benedikti XVI i ftoi të rinjtë e dioqezës së Romës në liturgjinë pendestare,
që do ta kryesojë të enjten pasdite në Bazilikën e Shën Pjetrit. Ata që dëshirojnë
– njoftoi Papa – do të kenë mundësi të marrin sakramentin e rrëfimit, takim i vërtetë
me dashurinë e Zotit, për të cilin çdo njeri ka nevojë, që të jetojë me gëzim e në
paqe.